കൊല്ലം: വിവാഹ ആലോചനയുടെ പേരിൽ വയോധികനെ വിളിച്ചുവരുത്തി മർദിച്ച് സ്വർണാഭരണങ്ങളും പണവും മൊബൈൽ ഫോണും കവർന്ന കേസിൽ യുവതി അറസ്റ്റിൽ. ചന്ദനത്തോപ്പ് അഞ്ചിതം വീട്ടിൽ ഹസീന (33)യെയാണ് കുണ്ടറ പൊലീസ് അറസ്റ്റ് ചെയ്തത്. ആയിരംതെങ്ങ് സ്വദേശി കെ. ബാബു (68) നൽകിയ പരാതിയിലാണ് നടപടി. കേസിലെ മറ്റ് രണ്ട് പ്രതികൾക്കായി പൊലീസ് അന്വേഷണം തുടരുകയാണ്.
സംഭവം കഴിഞ്ഞ ജൂൺ 16നായിരുന്നു. ബന്ധുവിന്റെ മകന് വധുവിനെ അന്വേഷിക്കുന്നതിനിടെയാണ് വിവാഹ ദല്ലാൾപണി നടത്തുന്ന ഹസീനയുമായി ബാബു പരിചയപ്പെട്ടത്. വിവാഹ ആലോചനയുമായി ബന്ധപ്പെട്ട് സംസാരിക്കാനുണ്ടെന്ന് അറിയിച്ച് ഹസീന വിളിച്ചതനുസരിച്ച് അന്ന് രാവിലെ പത്തുമണിയോടെ ബാബു കേരളപുരത്തെത്തി.
തുടർന്ന് ഹസീന ബാബുവിനെ സ്കൂട്ടറിൽ കയറ്റി നെടിവിള ക്ഷേത്രത്തിന് സമീപത്തെ വീട്ടിലെത്തിച്ചു. അവിടെ ഹസീന വിളിച്ചുവരുത്തിയ മറ്റ് രണ്ടുപേർ ചേർന്ന് ബാബുവിനെ മുറിയിൽ പൂട്ടിയിട്ട് മർദിക്കുകയായിരുന്നു എന്നാണ് പരാതി.
സ്വർണവും പണവും മൊബൈൽ ഫോണും കവർന്നു
ബാബുവിന്റെ കൈവശമുണ്ടായിരുന്ന മാലയും മോതിരവും ഉൾപ്പെടെ നാലു പവനിലധികം സ്വർണാഭരണങ്ങളും പേഴ്സിലുണ്ടായിരുന്ന 5,000 രൂപയും മൊബൈൽ ഫോണും പ്രതികൾ കവർന്നതായാണ് പരാതി. ആക്രമണത്തിന് പിന്നാലെ ബാബുവിന്റെ ഷർട്ട് അഴിച്ചുമാറ്റി ഹസീനയ്‌ക്കൊപ്പം ഇരുത്തി ഫോട്ടോയെടുത്തതായും പരാതിയിലുണ്ട്.
സംഭവത്തെക്കുറിച്ച് പുറത്തുപറഞ്ഞാൽ ഫോട്ടോ മക്കൾക്ക് അയച്ചുകൊടുക്കുമെന്ന് ഭീഷണിപ്പെടുത്തിയെന്നും പരാതിയിൽ പറയുന്നു. പിന്നീട് മറ്റ് രണ്ട് പ്രതികൾ ബാബുവിനെ ബൈക്കിൽ നടുക്കിരുത്തി കടവൂർ പാലത്തിന് സമീപം ഇറക്കിവിട്ടു.
മറ്റ് പ്രതികൾക്കായി അന്വേഷണം
സംഭവത്തിനുശേഷം ഒളിവിൽ പോയ പ്രതികളിൽ ഹസീനയെ പൊലീസ് തന്ത്രപൂർവം പിടികൂടുകയായിരുന്നു. അറസ്റ്റിലായ ഹസീനയെ കോടതിയിൽ ഹാജരാക്കിയശേഷം റിമാൻഡ് ചെയ്തു. കേസിൽ പങ്കുണ്ടെന്ന് സംശയിക്കുന്ന മറ്റ് രണ്ട് പേർക്കായി അന്വേഷണം തുടരുകയാണെന്ന് പൊലീസ് അറിയിച്ചു.
