ന്യൂഡൽഹി: വിമാനത്താവളത്തിലെ സുരക്ഷ പരിശോധനയുടെ ഭാഗമായി നടിയും നർത്തകിയുമായ സുധ ചന്ദ്രന്റെ കൃത്രിമക്കാൽ ഊരിമാറ്റാൻ ആവശ്യപ്പെട്ട സംഭവത്തിൽ മാപ്പപേക്ഷിച്ച് സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്‌സ്(സിഐഎസ്എഫ്). ഇത്തരത്തിൽ ഉള്ള പരിശോധന ഒഴിവാക്കൻ എന്തെങ്കിലും സംവിധാനം ഒരുക്കണമെന്ന് ആവശ്യപ്പെട്ട് സുധ പ്രധാനമന്ത്രി നരേന്ദ്ര മോദിയോട് അഭ്യർത്ഥിച്ചിരുന്നു. ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെയാണ് താരം ആവശ്യം ഉന്നയിച്ചത്.
വിമാനത്താവളത്തിലെ പരിശോധനയ്‌ക്കിടെ എപ്പോഴും കൃത്രിമക്കാൽ ഊരി മാറ്റേണ്ടിവരുന്നത് കടുത്ത വേദനയാണ് ഉണ്ടാക്കുന്നത്. പരിശോധനകൾ ഒഴിവാക്കാൻ തന്നെപ്പോലെ ഉള്ളവർക്ക് പ്രത്യേക കാർഡ് നൽകുന്ന കാര്യം പരിഗണിക്കണമെന്നും പ്രശ്നം പരിഹരിക്കാൻ അധികൃതർ ഉചിതമായ നടപടികൾ കൈക്കൊള്ളണമെന്നും സുധ അഭ്യർത്ഥിച്ചു.
‘സുരക്ഷ പരിശോധനയുടെ ഭാഗമായാണ് സുധ ചന്ദ്രനോട് കാൽ ഊരിമാറ്റാൻ ആവശ്യപ്പെട്ടത്. മാനദണ്ഡങ്ങൾ പ്രകാരം ഇത് ചെയ്യാൻ ഞങ്ങൾ നിർബന്ധിതരാണ്. ഇതിൽ സുധ ചന്ദ്രനുണ്ടായ ബുദ്ധിമുട്ടുകൾക്ക് ക്ഷമ ചോദിക്കുന്നു. ഇതിന് മുൻപ് ഇത്തരത്തിലുള്ള ദുരനുഭവം നേരിട്ട എല്ലാ യാത്രക്കാരോടും ഞങ്ങൾ ഇപ്പോൾ ക്ഷമ ചോദിക്കുകയാണ്’ സിഐഎസ്എഫ് ട്വിറ്ററിൽ കുറിച്ചു.
വർഷങ്ങൾക്കു മുൻപ് ചെന്നൈയിൽ നിന്നും തിരികെ വരുമ്പോൾ ഉണ്ടായ കാർ അപകടത്തെ തുടർന്നാണ് സുധ ചന്ദ്രന് കാൽ നഷ്ടപ്പെടുന്നത്. പിന്നീട് കൃത്രിമക്കാൽ ഉപയോഗിച്ച് സുധ നൃത്തത്തിലും അഭിനയത്തിലും തിരിച്ചെത്തി.
Comments