അമിത മദ്യപാനം കരളിന് കേടുവരുത്തുക മാത്രമല്ല, നിങ്ങളുടെ മൊത്തത്തിലുള്ള ആരോഗ്യത്തെ പ്രതികൂലമായി ബാധിക്കുകയും ചെയ്യും. അമിത മദ്യപാനം മൂലമുണ്ടാകുന്ന കരൾ തകരാറിനെ മദ്യവുമായി ബന്ധപ്പെട്ട കരൾ രോഗം അഥവാ ആൽക്കഹോൾ റിലേറ്റഡ് ലിവർ ഡിസീസ് എന്ന് വിളിക്കുന്നു.
മദ്യപാനം മൂലം കരൾവീക്കമുണ്ടാകുന്ന രോഗികളിലെ മദ്യാസക്തി കുറയ്ക്കാൻ മനുഷ്യവിസർജ്യം ഉപയോഗിച്ചുള്ള ചികിത്സയ്ക്കാകുമെന്ന് കണ്ടെത്തൽ . രാജഗരി ആശുപത്രി ലിവർ ഇൻസ്റ്റിറ്റ്യൂട്ട് ഹെപ്പറ്റോളജി വിഭാഗം ഫിസിഷ്യൻ സയന്റിസ്റ്റായ ഡോ. സിറിയക് അബി ഫിലിപ്സാണ് ഈ പഠന റിപ്പോർട്ടിനു പിന്നിൽ.
ആരോഗ്യമുള്ള വ്യക്തിയിൽ നിന്നു ശേഖരിക്കുന്ന വിസർജ്യം ഉപ്പുവെള്ളത്തിൽ കലർത്തി 2 തവണ ഫിൽറ്റർ പ്രക്രിയയ്ക്ക് വിധേയമാക്കും . തുടർന്ന് ട്യൂബ് വഴി ഇത് രോഗിയുടെ ചെറുകുടലിൽ എത്തിക്കും . ചെറുകുടലിലുള്ള, ശരീരത്തിനു ഹാനികരമായ വസ്തുക്കൾ ഉത്പാദിപ്പിക്കുന്ന ദോഷകരമായ അണുക്കളെ വിസർജ്യത്തിലടങ്ങിയ നല്ല അണുക്കൾ നശിപ്പിക്കുകയും നല്ല അണുക്കളുടെ പ്രവർത്തനം മെച്ചപ്പെടുത്തുകയും ചെയ്യും . 25,000 – 30,000 രൂപയാണു ചികിത്സച്ചെലവ്. ലിവർ മീറ്റിങ്ങിലെ ഏറ്റവും മികച്ച പ്രബന്ധങ്ങളുടെ പട്ടികയിൽ ഈ സ്റ്റൂൾ പ്ലാന്റ് പ്രക്രിയ ഇടം പിടിച്ചിട്ടുണ്ട്.
മദ്യപാനം മൂലം കരൾ രോഗമുണ്ടായവരിൽ സ്റ്റൂൾ ട്രാൻസ്പ്ലാന്റ് ചികിത്സ ഫലപ്രദമാണെന്ന് 2017ൽ ഡോ. സിറിയക് കണ്ടെത്തിയിരുന്നു. സ്റ്റൂൾ ട്രാൻസ്പ്ലാന്റനു വിധേയമാക്കിയ 35 രോഗികളെ 3 വർഷം നിരീക്ഷിച്ചപ്പോൾ 71.4% പേരും പിന്നീടു മദ്യപിച്ചിട്ടില്ലെന്നും 65.7% പേരിൽ ആയുർദൈർഘ്യം വർധിച്ചതായും കണ്ടെത്തി. സാധാരണ ചികിത്സയ്ക്കു വിധേയരായ 26 പേരെ നിരീക്ഷിച്ചപ്പോൾ 53.8% പേരും മദ്യപാനം തുടരുന്നതായും കണ്ടെത്തി.
അമേരിക്കൻ അസോസിയേഷൻ ഫോർ സ്റ്റഡി ഓഫ് ലിവർ ഡിസീസിന്റെ വാർഷിക സമ്മേളനത്തിൽ ഡോ. സിറിയക് ഈ പഠന റിപ്പോർട്ട് അവതരിപ്പിക്കും .
