ഫേസ്ബുക്ക് ഇനി ‘മെറ്റ’; മാതൃകമ്പനിയുടെ പേരുമാറ്റം പ്രഖ്യാപിച്ച് സക്കർബർഗ്

കാലിഫോർണിയ: മാതൃകമ്പനിയുടെ പേര് മെറ്റ എന്നാക്കി ഫേസ്ബുക്ക്. ഇനിമുതൽ മെറ്റ എന്ന പേരിലാണ് ഫേസ്ബുക്ക് അറിയപ്പെടുക. കൂടുതൽ, അപ്പുറത്ത് എന്നെല്ലാം അർത്ഥം വരുന്ന ഗ്രീക്ക് പദമാണ് മെറ്റ. തംബ് അപ്പ് ലോഗോയ്‌ക്ക് പകരം നീല ഇൻഫിനിറ്റി ഷേപ്പ് നൽകുന്ന മെറ്റ എന്നെഴുതിയ ചിഹ്നമാണ് മാതൃകമ്പനിയുടെ പുതിയ ലോഗോ. ഫേസ്ബുക്ക് കണക്ട് ഓഗ്മെന്റഡ് ആൻഡ് വിർച്വൽ റിയാലിറ്റി കോൺഫറൻസിൽ കമ്പനി സിഇഒ മാർക്ക് സക്കർബർഗാണ് ഇക്കാര്യം അറിയിച്ചത്.

Announcing @Meta — the Facebook company’s new name. Meta is helping to build the metaverse, a place where we’ll play and connect in 3D. Welcome to the next chapter of social connection. pic.twitter.com/ywSJPLsCoD

— Meta (@Meta) October 28, 2021

ഒരു സോഷ്യൽ മീഡിയ കമ്പനിയായി മാത്രം ഒതുങ്ങാതെ പ്രവർത്തനം വിപുലമാക്കാനുളള തയ്യാറെടുപ്പുകൾ ഫേസ്ബുക്ക് എന്നേ തുടങ്ങിയിരുന്നു. അതിനായുള്ള ഒരുക്കത്തിന്റെ ഭാഗമായാണ് പേര് മാറ്റം. അതേസമയം നിലവിൽ ഉപയോഗിക്കുന്ന ഫേസ്ബുക്ക്, ഇൻസ്റ്റഗ്രാം, വാട്സാപ്പ് എന്നീ ആപ്പുകളുടെ പേരിൽ മാറ്റമുണ്ടാകില്ലെന്നും ഇതിന്റെ ഉടമസ്ഥാവകാശമുള്ള മാതൃ കമ്പനിയുടെ പേരിലാണ് മാറ്റം വരുത്തുന്നതെന്നും സക്കർബർഗ് വ്യക്തമാക്കിയിട്ടുണ്ട്. കാലിഫോർണിയയിലെ മെൻലോ പാർക്കിലെ ആസ്ഥാനത്ത് കമ്പനി പുതിയ ലോഗോയും സക്കർബർഗ് അനാച്ഛാദനം ചെയ്തു.

കമ്പനിയുടെ മാർക്കറ്റ് പവർ, അൽഗോരിതം തീരുമാനങ്ങൾ, അതിന്റെ പ്ലാറ്റ്ഫോമുകളിലെ ദുരുപയോഗങ്ങളുടെ പോലീസ് നടപടികൾ എന്നിവയുമായി ബന്ധപ്പെട്ട കാര്യങ്ങൾ മാതൃസ്ഥാപനത്തിന് നേരിട്ട് ബാധ്യതയുണ്ടാക്കുന്നത് തടയുകയും പേരുമാറ്റത്തിലൂടെ ലക്ഷ്യമിടുന്നു. ഫേസ്ബുക്കിനെയോ മറ്റ് ആപ്ലിക്കേഷൻ സേവനങ്ങളെയോ സംബന്ധിച്ച കേസുകളും മറ്റും ഉടമസ്ഥ കമ്പനിയെ നേരിട്ട് ബാധിക്കാതിരിക്കാനാണ് പുതിയ തീരുമാനമെന്നും സക്കർബർഗ് വ്യക്തമാക്കി.