പനാജി; ഗോവയിൽ തൃണമൂൽ കോൺഗ്രസിന്റെ വേരുറപ്പിക്കാൻ നേരിട്ടിറങ്ങി മമത ബാനർജി. പനാജിയിലെത്തിയ മമത പാർട്ടി പ്രവർത്തകരുമായി ആശയവിനിമയം നടത്തി. ഗോവയുമായുളള ബന്ധവും അടുപ്പവും സൂചിപ്പിക്കാനായിരുന്നു ആദ്യ സന്ദർശനത്തിലെ ശ്രമം. ബംഗാൾ തന്റെ ജൻമഭൂമിയാണെങ്കിലും ഗോവയും അതുപോലെ മറ്റൊരു ജൻമഭൂമിയാണെന്നായിരുന്നു മമതയുടെ വാക്കുകൾ. ഇന്ത്യയാണ് തന്റെ ജൻമഭൂമി. അപ്പോൾ ബംഗാളും ഗോവയും തന്റെ ജൻമഭൂമി തന്നെയാണ്. മമത കൂട്ടിച്ചേർത്തു.
നിങ്ങളുടെ അധികാരം പിടിച്ചെടുക്കാനല്ല ഇവിടെ വന്നത്. നിങ്ങളുടെ ജോലിയിൽ സഹായിക്കാൻ വേണ്ടി മാത്രമാണ്. ഞാൻ നിങ്ങളുടെ സഹോദരിയെപ്പോലെയാണെന്നും മമത പറഞ്ഞു. ആളുകൾ കുഴപ്പത്തിലാകുമ്പോൾ അവരെ സഹായിച്ചാൽ അത് നമ്മുടെ ഹൃദയത്തിലുണ്ടാകും. ബംഗാൾ കരുത്തുളള ഒരു സംസ്ഥാനമായി മാറി. ഗോവയും അതുപോലെയാകണമെന്നാണ് തന്റെ ആഗ്രഹം.
മമത ബംഗാളിലല്ലേ ഗോവയിൽ എന്ത് ചെയ്യാനാണെന്ന് പലരും ചോദിക്കുന്നുണ്ട്. പക്ഷെ ഞാൻ ഒരു ഇന്ത്യനാണ്. തനിക്ക് ഇന്ത്യയിൽ എവിടെയും പോകാൻ അവകാശമുണ്ടല്ലോയെന്നും മമത ചോദിച്ചു. നാളുകളായി ഗോവ, ത്രിപുര, യുപി ഉൾപ്പെടെയുളള സംസ്ഥാനങ്ങളിലേക്ക് പ്രവർത്തനം വ്യാപിപ്പിക്കാൻ തൃണമൂൽ കോൺഗ്രസ് ശ്രമിക്കുന്നുണ്ട്. ഇതിന്റെ ഭാഗമായിട്ടായിരുന്നു മമതയുടെ സന്ദർശനം.
Comments