പുനീതിന്റെ മരണവാർത്ത ഞെട്ടലുണ്ടാക്കി; ഉൾക്കൊള്ളാനാവുന്നില്ല; അനുശോചിച്ച് മോഹൻലാൽ

തിരുവനന്തപുരം: കന്നഡ സൂപ്പർ താരം പുനീത് രാജ്കുമാറിന്റെ നിര്യാണത്തിൽ അനുശോചിച്ച് മോഹൻലാൽ. മരണവാർത്ത ഞെട്ടലുണ്ടാക്കിയെന്നും, വാർത്ത ഉൾക്കൊള്ളാൻ സാധിക്കുന്നില്ലെന്നും മോഹൻലാൽ പറഞ്ഞു. പുനീതിനൊപ്പം മൈത്രി എന്ന ചിത്രത്തിൽ മോഹൻലാൽ അഭിനയിച്ചിട്ടുണ്ട്.

‘ പുനീതിന്റെ മരണവാർത്ത ഞെട്ടലോടെയാണ് ഞാൻ കേട്ടത്. ഏറെ വർഷങ്ങളായി എനിക്ക് പുനീതിനെ അറിയാം. അദ്ദേഹത്തിന്റെ അച്ഛൻ രാജ്കുമാർ സാറുമായും എനിക്ക് അടുത്ത ബന്ധമുണ്ട്. എങ്ങനെ പ്രതികരിക്കണമെന്ന് എനിക്ക് അറിയില്ല. ഒരു മികച്ച നടനാണ് പുനീത്’ മോഹൻലാൽ പറഞ്ഞു.

ഹൃദയാഘാതത്തെ തുടർന്ന് ഇന്ന് ഉച്ചയോടെയാണ് പുനീത് അന്തരിച്ചത്. 46 വയസ്സായിരുന്നു. ഇന്ന് രാവിലെ വ്യായാമം ചെയ്യുന്നതിനിടെ ദേഹാസ്വാസ്ഥ്യം അനുഭവപ്പെട്ടതിനെ തുടർന്നാണ് അദ്ദേഹത്തെ ആശുപത്രിയിൽ പ്രവേശിപ്പിച്ചത്. എന്നാൽ അതീവ ഗുരുതരാവസ്ഥയിലായിരുന്ന താരത്തെ രക്ഷിക്കാനായില്ല.

കന്നട സിനിമയിൽ ഏറ്റവും കൂടുതൽ പ്രതിഫലം വാങ്ങുന്ന താരമാണ് പുനീത് കുമാർ. ഏപ്രിലിൽ പുറത്തിറങ്ങിയ യുവരത്‌നയാണ് അദ്ദേഹം അഭിനയിച്ച അവസാന ചിത്രം. പ്രശസ്ത കന്നട നടൻ ഡോ രാജ്കുമാറിന്റെ മകനാണ് പുനീത് രാജ് കുമാർ. ബാലതാരമായാണ് പുനീത് സിനിമ രംഗത്തേയ്‌ക്ക് പ്രവേശിച്ചത്. ബെട്ടാഡ ഹൂവിലെ അപ്പു എന്ന കഥാപാത്രത്തിന് മികച്ച ബാലതാരത്തിനുള്ള ദേശീയ അവാർഡും അദ്ദേഹത്തിന് ലഭിച്ചിട്ടുണ്ട്.