വാഷിംഗ്ടൺ : അപകടകാരികളായ ആപ്പുകൾ ഉപയോക്താക്കളുടെ ഫോണുകളിൽ ഉണ്ടെങ്കിൽ നീക്കം ചെയ്യണമെന്ന് ഗൂഗിൾ നിർദ്ദേശിച്ചു. 151 ആപ്പുകളാണ് ഫോണുകളിൽ നിന്ന് നീക്കം ചെയ്യാൻ ഗൂഗിൾ നിർദ്ദേശിച്ചത്. ആൻഡ്രോയ്ഡ് ഫോണുകളിൽ എസ്എംഎസ് തട്ടിപ്പ് നടത്താൻ സാധ്യതയുള്ള ആപ്പുകളാണ് ഗൂഗിൾ നീക്കം ചെയ്യാൻ നിർദ്ദേശിച്ചത്. 1.05 കോടിയിലേറെ പേരാണ് ഇത്തരം ആപ്പുകൾ നിലവിൽ ഉപയോഗിക്കുന്നതായി കണ്ടെത്തിയിട്ടുള്ളത്.
കഴിഞ്ഞമാസം ആദ്യം സൈബർ സെക്യൂരിറ്റി സ്ഥാപനമായ അവസ്റ്റ് ഈ ആപ്പുകളെക്കുറിച്ച് മുന്നറിയിപ്പ് നൽകിയിരുന്നു. ഈ ആപ്പുകൾ ഉപയോഗിച്ച് വ്യാപകമായി പ്രിമീയം എസ്എംഎസ് ക്യാംപെയിൻ നടക്കുന്നു എന്നാണ് കണ്ടെത്തിയത്.151 ആപ്പുകളിൽ ഏതെങ്കിലും ഫോണിൽ ഇൻസ്റ്റാൾ ചെയ്താൽ. ഉപയോക്താക്കളുടെ ലോക്കേഷൻ വിവരങ്ങൾ, ഐഎംഇഐ നമ്പർ, ഫോൺ നമ്പർ ഇങ്ങനെ പല വിവരങ്ങളും ഈ ആപ്പുകൾ ശേഖരിച്ച് കൈമാറും.
ഫോട്ടോ എഡിറ്ററുകൾ, വീഡിയോ എഡിറ്ററുകൾ, സ്പാംകോൾ ബ്ലോക്കർ, ക്യാമറ ഫിൽട്ടേർസ്, ക്യൂആർ കോഡ് സ്‌കാനർ, വിവിധ ഗെയിം ആപ്പുകൾ എന്നിങ്ങനെ വിവിധ വിഭാഗത്തിൽപ്പെടുന്ന ആപ്പുകളാണ് എസ്എംഎസ് ക്യാംപെയിന് ആവശ്യമായ വിവരങ്ങൾ ചോർത്തുന്നത്.
