ജലനിരപ്പ് ഉയരുന്നു ; ഇടുക്കി അണക്കെട്ടിന്റെ ഷട്ടറുകൾ ഇന്ന് തുറക്കും ; പെരിയാറിന്റെ തീരത്തുള്ളവർക്ക് ജാഗ്രതാ നിർദ്ദേശം

ഇടുക്കി : ജലനിരപ്പ് ഉയരുന്ന സാഹചര്യത്തിൽ ഇടുക്കി അണക്കെട്ടിന്റെ ഷട്ടർ തുറക്കും. ഒരു ഷട്ടർ തുറന്നാണ് അധിക ജലം പുറത്തേക്കൊഴുക്കുക. ജലവിഭവവകുപ്പ് മന്ത്രി റോഷി അഗസ്റ്റിൻ ഫേസ്ബുക്കിലൂടെയാണ് ഇക്കാര്യം അറിയിച്ചത്. അണക്കെട്ട് തുറക്കുന്നതിനാൽ പെരിയാറിൽ ജലനിരപ്പ് ഉയരാൻ സാദ്ധ്യതയുണ്ട്. ഈ സാഹചര്യത്തിൽ പെരിയാറിന്റെ നദീതീരങ്ങളിലുള്ളവർ ജാഗ്രത പാലിക്കണമെന്നും അദ്ദേഹം അറിയിച്ചു.

ഉച്ചയ്‌ക്ക് രണ്ട് മണിക്കാണ് ഷട്ടർ തുറക്കുക. 40 സെന്റമീറ്റർ ഉയർത്തിയാകും വെള്ളം പുറത്തേക്ക് ഒഴുക്കുക. നിലവിൽ 2398.76 ആണ് ഇടുക്കി അണക്കെട്ടിലെ ജലനിരപ്പ്. മഴ തുടരുന്ന സാഹചര്യത്തിൽ ഇടുക്കി അണക്കെട്ട് തുറക്കുന്നതുമായി ബന്ധപ്പെട്ട് യോഗം ചേർന്നിരുന്നു. ഇതിലാണ് ഷട്ടർ ഉയർത്താൻ തീരുമാനിച്ചത്. കഴിഞ്ഞ ദിവസം അണക്കെട്ട് തുറക്കാൻ തീരുമാനിച്ചെങ്കിലും പിന്നീട് തീരുമാനം മാറ്റുകയായിരുന്നു. ജലനിരപ്പ് ഉയർന്ന സാഹചര്യത്തിൽ കഴിഞ്ഞ മാസവും അണക്കെട്ട് തുറന്നിരുന്നു.

നിലവിൽ മുല്ലപ്പെരിയാർ അണക്കെട്ടിലെ ജല നിരപ്പും ഉയരുന്നുണ്ട്. ഈ സാഹചര്യത്തിൽ മുല്ലപ്പെരിയാർ അണക്കെട്ടിന്റെ ഷട്ടറുകളും തുറക്കാനാണ് സാദ്ധ്യത. മുല്ലപ്പെരിയാറിൽ നിന്നുള്ള വെള്ളം ശേഖരിക്കുന്നിതിന് വേണ്ടിക്കൂടിയാണ് ഇടുക്കി തുറക്കുന്നത്.