മുംബൈ: മുംബൈ പോലീസിനെ പരിഹസിച്ച് ബോളിവുഡ് താരം കങ്കണ റണാവത്ത്. എല്ലാ ദിവസവും തനിക്കെതിരെ പ്രതികാര നടപടി പോലെ മുംബൈ പോലീസ് കേസെടുക്കുകയാണെന്ന് കങ്കണ പറയുന്നു. ഇൻസ്റ്റഗ്രാമിൽ പങ്കുവെച്ച സ്റ്റോറിയിലൂടെയാണ് പരിഹാസവുമായി താരം എത്തിയത്. സിഖ് സംഘടനയുടെ പരാതിയിൽ കങ്കണയ്ക്കെതിരെ മുംബൈ പോലീസ് കേസ് രജിസ്റ്റർ ചെയ്തതിന് പിന്നാലെയാണിത്.
2014ൽ എടുത്ത ഒരു ചിത്രമാണ് താരം പങ്കുവെച്ചിരിക്കുന്നത്. ചിത്രത്തിൽ മദ്യം നിറച്ച ഗ്ലാസുമായി പോസ് ചെയ്ത് നിൽക്കുന്ന താരത്തെ കാണാനാകും. ‘മറ്റൊരു ദിവസം മറ്റൊരു കേസ്, ഇനി എങ്ങാനും അടുത്ത ദിവസം അവരെന്നെ അറസ്റ്റ് ചെയ്യാൻ വന്നാൽ എന്റെ അവസ്ഥ ഇതായിരിക്കും’ കങ്കണ കുറിച്ചു.
മഹാരാഷ്ട്ര സർക്കാരിന്റെ ഭരണത്തെ ചോദ്യം ചെയ്തതിന് പിന്നാലെയാണ് കങ്കണയ്ക്കെതിരെ മുംബൈ പോലീസ് പ്രതികാര നടപടിപോലെ കേസ് എടുക്കുന്നത്. പലകേസുകളിലും താരത്തെ കുടുക്കി നാവടപ്പിക്കാൻ ശ്രമിക്കുകയാണെന്ന ആക്ഷേപമാണ് ഉയരുന്നത്. ശിവസേനയാണ് മുംബൈ പോലീസിന്റെ പ്രതികാര നടപടിയ്ക്ക് പിന്നിൽ.
സിഖ് സമുദായത്തെ അപകീർത്തിപ്പെടുത്തിയെന്ന് ആരോപിച്ചായിരുന്നു കങ്കണയ്ക്കെതിരെ മുംബൈ പോലീസ് രജിസ്റ്റർ ചെയ്ത പുതിയ കേസ്. കാർഷിക നിയമത്തെ വിമർശിച്ച് സമരം ചെയ്യുന്നവർ ഖാലിസ്ഥാൻ അനുകൂലികളാണെന്ന് കങ്കണ വിമർശിച്ചിരുന്നു. ഇതിന്റെ പേരിലാണ് ഡൽഹിയിലെ സിഖ് ഗുരുദ്വാര മാനേജ്മെന്റ് കമ്മിറ്റി കങ്കണയ്ക്കെതിരെ പരാതി നൽകിയത്.
Comments