നവംബർ 26…ഇന്ത്യൻ ഭരണഘടന അംഗീകരിക്കപ്പെട്ട ദിവസം.. രാജ്യ ചരിത്രത്തിലെ നിർണായക ദിവസങ്ങളിൽ ഒന്ന് … രാജ്യത്തെ അച്ചടക്കത്തോടെ നിലനിർത്തുന്ന നിയമങ്ങളെയും ഭരണസംവിധാനത്തിലുള്ള നമ്മുടെ വിശ്വാസത്തെയും അടയാളപ്പെടുത്തുന്നത് നമ്മുടെ ഭരണഘടനയിലൂടെയാണ് . ഇന്ത്യയിലെ ജനങ്ങളായ നാം….. എന്ന വാചകത്തോടെയാണ്…….. പരമോന്നത നിയമമായ ഭരണഘടന തുടങ്ങുന്നത് തന്നെ. എഴുതപ്പെട്ട ഭരണഘടനകളിൽ ഏറ്റവും വലുതാണ് ഇന്ത്യൻ ഭരണഘടന. വർഷങ്ങളുടെ വലിയ കഠിനാധ്വാനമുണ്ട് ഇതിന് പിന്നിൽ.ഏറെ സവിശേഷതകളുള്ള ഇന്ത്യൻ ഭരണഘടനയോടുള്ള ആദരസൂചകമായാണ് നവംബർ 26 ഭരണഘടന ദിനമായി രാജ്യം ആചരിക്കുന്നത്..
2015 വരെ ഭരണഘടന ദിനം അറിയപ്പെട്ടിരുന്നത് നിയമ ദിനമായാണ്. 2015 ഒക്ടോബർ 11 ന് മുബൈയിലെ സ്റ്റാച്യു ഓഫ് ഇക്വാലിറ്റിക്ക് തറക്കില്ലിട്ട് കൊണ്ട് പ്രധാനമന്ത്രി നരേന്ദ്ര മോദിയാണ് ഇത് സംബന്ധിച്ച ഔദ്യോഗിക പ്രഖ്യാപനം നടത്തിയത്.തുടർന്ന് 2015 നവംബർ 19ന് നവംബർ 26 ഭരണഘടന ദിനമായി കേന്ദ്രസർക്കാർ പ്രഖ്യാപിച്ചു. ജനങ്ങൾക്കിടെയിൽ ഭരണഘടന മൂല്യങ്ങൾ വളർത്താനും പ്രോത്സാഹിപ്പിക്കാനുമാണ് ഭരണഘടന ദിനം ആചരിക്കുന്നത്. സംവിധാൻ ദിവസ് എന്ന പേരിലാണ് ഈ ദിവസം ആചരിക്കപ്പെടുന്നത്. അംബേദ്കറുടെ ജന്മവാർഷിക ദിനം വരെയാണ് ഭരണഘടനാദിനം അഥവാ സംവിധാൻ ദിവസ് ആഘോഷങ്ങൾ നടക്കുക. കേന്ദ്ര സർക്കാരിന്റെയും സംസ്ഥാന സർക്കാരുകളുടെയും സംയുക്താഭിമുഖ്യത്തിലാണ് ആഘോഷങ്ങൾ, രാഷ്‌ട്രപതി ഭവൻ, രാജ്ഭവൻ, വിദ്യാലയങ്ങൾ സന്നദ്ധ സംഘടനകൾ എന്നിവയും ആഘോഷങ്ങളിൽ പങ്കാളികളാകും.
ഡോ. സച്ചിദാനന്ദ സിൻഹയുടെ നേതൃത്വത്തിൽ 1946 ഡിസംബർ 9ന് ഭരണഘടന അസംബ്ലി ആദ്യമായി യോഗം ചേർന്നു. 9 സ്ത്രീകളടക്കം 207 അംഗങ്ങൾ ഈ സമ്മേളനത്തിൽ പങ്കെടുത്തു. ഈ യോഗം വിജയം കണ്ടതോടെ 1947 ഓഗസ്റ്റ് 29ന് ഡോ. ബി.ആർ അംബേദ്കറുമായി ചേർന്ന് ഒരു കരട് സമിതി രൂപീകരിക്കാൻ തീരുമാനമായി. 1949 നവംബർ 26ന് അംബേദ്കറുടെ നേതൃത്വത്തിലുള്ള പ്രവർത്തനങ്ങൾ പൂർത്തിയായി. തുടർന്ന് 1950 ജനുവരി 26ന് ഇന്ത്യൻ ഭരണഘടന പ്രാബല്യത്തിൽ വന്നു .ഇന്ത്യൻ ഭരണഘടനയുടെ ശില്പി എന്നറിയപ്പെടുന്നത് അംബേദ്കറാണ്. ഭരണഘടന ദൗത്യം പൂർത്തിയാക്കാൻ അദ്ദേഹത്തിന് വേണ്ടിവന്നത് രണ്ട് വർഷവും പതിനൊന്ന് മാസവുമാണ്. അവസാനം 1948 ഫെബ്രുവരിയിൽ ഭരണഘടനയുടെ ആദ്യപകർപ്പ് പ്രസിദ്ധീകരിച്ചു. നിയമനിർമാണ സഭയെന്ന നിലയ്‌ക്കുള്ള കോൺസ്റ്റിറ്റിയുവന്റ് അസംബ്ലി ആദ്യമായി നവംബർ 17ന് ചേരുകയും 1950 ജനുവരി 26ന് ഭരണഘടന നിലവിൽ വരുകയും ചെയ്തു എന്നതാണ് ചരിത്രം
Comments