ആറു ലക്ഷം ഏകെ-203 റൈഫിളുകൾ സ്വന്തമാക്കി ഇന്ത്യ ; ഇന്ത്യ-റഷ്യ പ്രതിരോധ കരാർ ഒപ്പിട്ടെന്ന് രാജ്‌നാഥ് സിംഗ്

ന്യൂഡൽഹി: ലോകത്തിലെ ഏറ്റവും മികച്ച റൈഫിളുകൾ സ്വന്തമാക്കി ഇന്ത്യ. റഷ്യൻ നിർമ്മിത ഏകെ- 203 അസോൾട്ട് റൈഫിളുകളാണ് ഇന്ത്യ വാങ്ങുന്നത്. റഷ്യൻ പ്രതിരോധ മന്ത്രി ജനറൽ സെർഗേ ഷോയിഗുവും ഇന്ത്യൻ പ്രതിരോധ മന്ത്രി രാജ്‌നാഥ് സിംഗും തമ്മിലാണ് ഇന്ന് കരാർ ഒപ്പിട്ടത്.

റഷ്യൻ പ്രസിഡന്റ് വാല്ദിമിർ പുടിൻ ഇന്ന്  എത്തുന്നതിന് മുന്നോടിയായാണ് ദ്വിതല മന്ത്രാലയ ഉന്നതതല യോഗത്തിന് രാവിലെ തുടക്കം കുറിച്ചത്. ഒരേ സമയമാണ് പ്രതിരോധ മന്ത്രാലയവും വിദേശകാര്യമന്ത്രാലയവും ഡൽഹിയിൽ യോഗം നടത്തിക്കൊണ്ടിരിക്കുന്നത്.

ഇന്ത്യ-റഷ്യ സുപ്രധാന പ്രതിരോധ കരാർ പ്രകാരം ഏകെ-203 തോക്കുകളും അത്യാധുനിക മിസൈൽ വിക്ഷേപണിഎസ്-400 ഉം സ്വന്തമാക്കാനുള്ള ധാരണ നേരത്തെ പ്രഖ്യാപിച്ചതാണ്.

ഇതിനൊപ്പം ഉത്തർപ്രദേശിലെ ആയുധ നിർമ്മാണശാലയിൽ ഭാവിയിൽ ഏകെ-203 റൈഫിളുകൾ ആത്മനിർഭർ ഭാരത് പദ്ധതിപ്രകാരം നിർമ്മിക്കാനും ഇന്ത്യൻ പ്രതിരോധ മന്ത്രാലയം തീരുമാനം എടുത്തിരുന്നു.