യുവേഫാ ചാമ്പ്യൻസ് ലീഗ്: ബാഴ്‌സലോണ പുറത്ത്; ബയേൺ തകർത്തത് 3-0ന്

മ്യൂണിച്ച്: യുവേഫാ ചാമ്പ്യൻസ് ലീഗിൽ നിന്നും സൂപ്പർ ക്ലബ്ബായ ബാഴ്‌സലോണ പുറത്ത്. ഗ്രൂപ്പ് ഇയിലെ പോരാട്ടത്തിൽ കരുത്തരായ ബയേൺ മ്യൂണിച്ചാണ് എതിരില്ലാത്ത മൂന്ന് ഗോളുകൾക്ക് ബാഴ്‌സലോണയെ തകർത്തത്.

കളിയുടെ 34-ാം മിനിറ്റിൽ തോമസ് മുള്ളറാണ് ആദ്യ ഗോൾ നേടിയത്. 43-ാം മിനിറ്റിൽ ലെറോയ് സാനേ രണ്ടാം ഗോളും 62-ാം മിനിറ്റിൽ ജമാൽ മുസിയാല മൂന്നാം ഗോളും നേടി. ഗ്രൂപ്പിൽ നിലവിൽ ഒന്നാം സ്ഥാനത്താണ് ബയേൺ. ആറിൽ ആറ് മത്സരങ്ങളും ജയിച്ചാണ് ജർമ്മൻ ചാന്പ്യന്മാർ വിജയക്കുതിപ്പ് തുടരുന്നത്.  ആറു മത്സരംമാത്രമുള്ള ഗ്രൂപ്പ് ഘട്ടത്തിൽ തീർത്തും നിറം മങ്ങിയ ബാഴ്‌സ രണ്ടു മത്സരത്തിൽ മാത്രമാണ് ജയിച്ചത്. ഒരു മത്സരം സമനിലയിലുമായി. ബയേണിന് പിന്നിൽ ബെനഫിക്കയാണ് രണ്ടാം സ്ഥാനത്ത്. ഗ്രൂപ്പിൽ ബാഴ്‌സയ്‌ക്ക് പിന്നിലുള്ളത് ഡൈനാമോ കീവാണ്.

ചാമ്പ്യൻസ് ലീഗിലെ പ്രീക്വാർട്ടർപോലും കാണാതെ പുറത്തായതോടെ സ്പാനിഷ് കരുത്തന്മാർക്ക് ഇനി അവശേഷിക്കുന്നത് ലീഗ് മത്സരങ്ങളും യൂറോപ്പാ ലീഗുമാണ്.

ചാമ്പ്യൻസ് ലീഗിൽ പ്രീക്വാർട്ടർ പോരാട്ടങ്ങളുടെ പട്ടിക ഈ മാസം 13ന് പുറത്തുവിടും. മാർച്ച് മാസം 18-ാം തിയതി ക്വാർട്ടർ പട്ടിക പുറത്തിറക്കും.

ഫെബ്രുവരി 15,16,22,23 തിയതികളിലാണ് ആദ്യപാദ പ്രീക്വാർട്ടർ പോരാട്ടവും മാർച്ച് 8,9,15,16 തീയതികളിൽ രണ്ടാം പാദവും നടക്കും. ക്വാർട്ടർ പോരാട്ടങ്ങളിലെ ആദ്യപാദം ഏപ്രിൽ 5,6 തീയതികളിലും രണ്ടാം പാദം12,13 തിയതികളിലുമാണ് തീരുമാനിച്ചിട്ടുള്ളത്.

26,27 തീയതികളിൽ സെമിഫൈനൽ ആദ്യപാദവും മെയ് മാസം 3,4 തീയതികളിൽ രണ്ടാം പാദവും അരങ്ങേറും. 2022 മെയ് 28നാണ് റഷ്യയിലെ സെന്റ് പീറ്റേഴ്‌സ് ബർഗിലെ ഗാസ്‌പ്രോം അറീനയിൽ കലാശപോരാട്ടം നടക്കുന്നത്.