മുംബൈ: 200 കോടിയുടെ സാമ്പത്തിക തട്ടിപ്പ് കേസിൽ അറസ്റ്റിലായ സുകേഷ് ചന്ദ്രശേഖറിനെ കുറിച്ചുള്ള കൂടുതൽ വിവരങ്ങൾ പുറത്ത്. ബോളിവുഡ് നടി ജാക്വിലിൻ ഫെർണാണ്ടസിന് പുറമെ ഒട്ടേറെ പ്രമുഖ താരങ്ങൾക്ക് ഇയാൾ ആഡംബര സമ്മാനങ്ങൾ നൽകിയിരുന്നതായി എൻഫോഴ്‌സ്‌മെന്റ് ഡയറക്ടറേറ്റ് അറിയിച്ചു. വ്യത്യസ്ത പേരുകളിലാണ് സുകേഷ് സമ്മാനങ്ങൾ അയച്ചിരുന്നതെന്നും ഇ.ഡി വ്യക്തമാക്കി.
അനേകം ബോളിവുഡ് നടിമാർക്ക് സുകേഷ് സമ്മാനങ്ങൾ അയച്ചിരുന്നു. ജാക്വിലിന് മുൻപ് മറ്റ് നടിമാരുടെ സൗന്ദര്യത്തിൽ മയങ്ങിയാണ് ഇയാൾ സമ്മാനങ്ങൾ അയച്ചിരുന്നത്. എന്നാൽ പല പ്രമുഖ താരങ്ങളും ഇയാളുടെ സമ്മാനങ്ങൾ സ്വീകരിക്കാൻ തയ്യാറായില്ല. തുടർന്നാണ് മറ്റ് പേരുകളിൽ സമ്മാനങ്ങൾ സുകേഷ് അയക്കാൻ തുടങ്ങിയതെന്ന് ഇ.ഡി പറയുന്നു.
സാമ്പത്തിക തട്ടിപ്പ് കേസിൽ സുകേഷ് പിടിയിലായതോടെയാണ് പ്രമുഖ നടിമാർ ഇയാളെ കുറിച്ചുള്ള വിവരങ്ങൾ അറിയുന്നത്. ഇതിനുശേഷമാണ് നടിമാർക്ക് വ്യാജ പേരുകളിൽ ലഭിച്ചിരുന്ന ആഡംബര സമ്മാനങ്ങൾ ഇയാൾ നൽകിയതാണെന്ന് തിരിച്ചറിഞ്ഞത്. മുൻപ് ശേഖർ രത്‌നാവേല എന്ന പേരിലാണ് ഇയാൾ ജാക്വിലിനെ സമീപിച്ചതെന്നും ഇ.ഡി കൂട്ടിച്ചേർത്തു.
വില കൂടിയ സമ്മാനങ്ങളാണ് സുകേഷ് ജാക്വിലിന് നൽകിയത്. ഇരുവരും പരസ്പരം കാണുകയും, യാത്ര ചെയ്യുന്നതും പതിവായിരുന്നു. നടിയ്‌ക്ക് പത്ത് കോടിയിലധികം വിലയുള്ള സമ്മാനങ്ങളാണ് സുകേഷ് നൽകിയത്. ആഡംബര കാറുകളടക്കം ഇയാൾ സമ്മാനിച്ചിരുന്നതായി ഇ.ഡിക്ക് വിവരം ലഭിച്ചിരുന്നു. ഇതിന്റെ അടിസ്ഥാനത്തിൽ ചോദ്യം ചെയ്തപ്പോൾ സുകേഷ് ഇ.ഡിക്ക് മൊഴിയും നൽകി.
തട്ടിപ്പ് കേസിൽ സുകേഷ് ജയിലിൽ കഴിഞ്ഞിരുന്ന സമയങ്ങളിലും ഇയാൾ ജാക്വിലിനുമായി ഫോണിൽ നിരന്തരം ബന്ധപ്പെട്ടിരുന്നു. 2021 ജനുവരി മുതൽ ഇവർ തമ്മിൽ പല ഇടപാടുകളും നടന്നതായി ഇഡിയുടെ കുറ്റപത്രത്തിൽ വ്യക്തമാക്കിയിട്ടുണ്ട്. ജാക്വിലിന് കോടികൾ വിലമതിക്കുന്ന സമ്മാനങ്ങളാണ് പ്രതി നൽകിയത്. വജ്രാഭരണങ്ങൾ, ഒൻപത് ലക്ഷത്തിന്റെ നാല് പേർഷ്യൻ പൂച്ച കുഞ്ഞുങ്ങൾ, 52 ലക്ഷത്തിന്റെ ഒരു കുതിര എന്നിവയാണ് ജാക്വിലിന് ഇയാൾ സമ്മാനിച്ചത്. കൂടാതെ, സുകേഷ് ജാമ്യത്തിലിറങ്ങിയ സമയത്ത് ചാർട്ടേർഡ് വിമാനത്തിൽ ഇരുവരും യാത്ര ചെയ്തിരുന്നു എന്നും ഇ.ഡി വെളിപ്പെടുത്തി.
സുകേഷുമായി അടുത്ത ബന്ധം പുലർത്തുന്ന മറ്റൊരു നടിയാണ് നോറ ഫത്തേഹി. ഇവർക്കായി ഒരു ബിഎംഡബ്ല്യൂ കാറും ആപ്പിളിന്റെ വിലകൂടിയ ഫോണും സുകേഷ് നൽകിയതായി ഇ.ഡി പറഞ്ഞിരുന്നു.
Comments