തിലക് മൈതാൻ : ഇന്ത്യൻ സൂപ്പർ ലീഗ് ഫുട്‌ബോളിൽ മഞ്ഞപ്പടയ്‌ക്ക് വീണ്ടും മിന്നും ജയം. കരുത്തരായ ചെന്നൈയെ എതിരില്ലാത്ത മൂന്ന് ഗോളുകൾക്കാണ് ബ്ലാസ്റ്റേഴ്സ്സ് തകർത്തത്. പെരേര ഡയസ്, അഡ്രിയൻ ലൂണ, മലയാളി താരം സഹൽ അബ്ദുൽ സമദ് എന്നിവരാണ് ബ്ലാസ്റ്റേഴ്സിന് വേണ്ടി ഗോൾ നേടിയത്. ജയത്തോടെ ഏഴ് മത്സരങ്ങളിൽ നിന്ന് 12 പോയിന്റോടെ ബ്ലാസ്റ്റേഴ്സ് പോയിന്റ് പട്ടികയിൽ മൂന്നാം സ്ഥാനത്തെത്തി. 26-ാം തീയതി ജംഷഡ്പൂരിനെതിരെയാണ് ബ്ലാസ്റ്റേഴ്‌സിന്റെ അടുത്ത മത്സരം
ജോർജ് ഡയസും സഹൽ അബ്ദുൾ സമദും ആദ്യപകുതിയിൽ ഗോളടിച്ചു.
കളിയുടെ അവസാന ഘട്ടത്തിൽ അഡ്രിയാൻ ലൂണയുടെ തകർപ്പൻ ഗോളിൽ ജയമുറപ്പിച്ചു. ജയത്തോടെ ഏഴ് കളിയിൽ 12 പോയിന്റുമായി മൂന്നാം സ്ഥാനത്തേക്ക് കുതിച്ചു ഇവാൻ വുകോമനോവിച്ചിന്റെ സംഘം. മൂന്ന് വീതം ജയവും സമനിലയും. തോറ്റത് ഒന്നിൽ മാത്രം.
അവസാന മൂന്ന് കളിയിൽ വഴങ്ങിയത് ഒരേയൊരു ഗോൾ മാത്രം. കരുത്തരായ ഒഡീഷ എഫ്സി, മുംബൈ സിറ്റി എന്നീ ടീമുകളെ വീഴ്‌ത്തി വന്ന ബ്ലാസ്റ്റേഴ്സിന് മുന്നിൽ ചെന്നൈയിനും വീണു. ഒന്നാമതുള്ള മുംബൈ സിറ്റിയുമായി മൂന്ന് പോയിന്റ് മാത്രം പിന്നിലാണ് ബ്ലാസ്റ്റേഴ്സ്. രണ്ടാമതുള്ള ജംഷഡ്പുർ എഫ്സിക്കും 12 പോയിന്റാണ്.
