തിരുവനന്തപുരം: കേരള ചലച്ചിത്ര അക്കാദമി ചെയർമാൻ സ്ഥാനത്തേക്ക് സംവിധായകൻ രഞ്ജിത്തിനെ പരിഗണിക്കുന്നു. പിന്നണി ഗായകൻ എംജി ശ്രീകുമാറിന് സംഗീത നാടക അക്കാദമി ചെയർമാൻ സ്ഥാനം നൽകുന്നതും പരിഗണനയിലുണ്ട്. പ്രസ്തുത സ്ഥാനങ്ങളിലേക്ക് ഇരുവരെയും പരിഗണിച്ചുകൊണ്ടുള്ള തീരുമാനം സിപിഎമ്മിന്റെ സംസ്ഥാന സെക്രട്ടറിയേറ്റ് യോഗത്തിലാണുണ്ടായത്.
ഇതുസംബന്ധിച്ച സർക്കാർ ഉത്തരവ് ഉടൻ പുറത്തിറക്കുമെന്നാണ് സൂചന. നിലവിൽ സംഗീത നാടക അക്കാദമിയുടെ ചെയർപേഴ്‌സൺ സ്ഥാനത്ത് നടി കെപിഎസി ലളിതയാണുള്ളത്. ചലച്ചിത്ര അക്കാദമി ചെയർമാൻ സ്ഥാനത്ത് സംവിധായകൻ കമലാണ്. ഇരുവരുടെയും കാലാവധി അവസാനിക്കുന്ന സാഹചര്യത്തിലാണ് എംജി ശ്രീകുമാറിനെയും സംവിധായകൻ രഞ്ജിത്തിനെയും പരിഗണിക്കുന്നത്.
2016ലായിരുന്നു സംവിധായകൻ കമലിനെ ചെയർമാൻ സ്ഥാനത്തേക്ക് തിരഞ്ഞെടുത്തത്. സാധാരണ ഗതിയിൽ മൂന്ന് വർഷത്തേക്കാണ് ചുമതല. ആദ്യ പിണറായി സർക്കാരിന്റെ കാലത്ത് കമലിന്റെ കാലാവധി കഴിഞ്ഞപ്പോൾ നീട്ടി നൽകുകയായിരുന്നു. വീണ്ടും കാലാവധി തീരാൻ പോകുന്നതിന്റെ പശ്ചാത്തലത്തിലാണ് രഞ്ജിത്തിനെ പരിഗണിച്ചിരിക്കുന്നത്.
Comments