പറക്കുന്നതിനിടെ വിമാനത്തിലേക്ക് പതിച്ചത് കൂറ്റൻ ഐസ് കഷ്ണം; യാത്രികർ രക്ഷപ്പെട്ടത് തലനാരിഴയ്‌ക്ക് ; വിമാനത്തിന്റെ വിന്റ് ഗ്ലാസ് തകർന്നു

ഇംഗ്ലണ്ട് : പറക്കുന്നതിനിടെ ബ്രിട്ടീഷ് എയർവേസ് വിമാനത്തിന് മുകളിലക്ക് ഐസ് വീണു. ബോയിംഗ് 777 വിമാനത്തിന് മുകളിലാണ് കിലോക്കണക്കിന് ഭാരം വരുന്ന ഐസുകട്ട വീണത്. സംഭവത്തിൽ വിമാനത്തിന്റെ വിന്റ് ഗ്ലാസ് തകർന്നു.

വിനോദസഞ്ചാരികളുമായി ലണ്ടനിലെ ഗാട്ട്വിക്കിൽ നിന്നും സാൻജോസിലേക്ക് പോകുന്നതിനിടെയായിരുന്നു സംഭവം. വിമാനം പറന്ന് 1000 അടി മുകളിലേക്ക് എത്തിയപ്പോൾ വലിയ ഐസ് കഷ്ണം വിമാനത്തിന്റെ ഗ്ലാസിലേക്ക് പതിക്കുകയായിരുന്നു. തുടർന്ന് വിമാനം അടിയന്തിരമായി താഴെയിറക്കി. ഇടിയുടെ ആഘാതത്തിൽ രണ്ട് ഇഞ്ച് കനമുള്ള ഗ്ലാസ് പൂർണമായും തകർന്നു. സംഭവ സമയം 200 പേരാണ് വിമാനത്തിൽ ഉണ്ടായിരുന്നത്. തലനാരിഴയ്‌ക്കാണ് ഇവർ വൻ ദുരന്തത്തിൽ നിന്നും രക്ഷപ്പെട്ടത്.

സംഭവത്തിൽ ബ്രിട്ടീഷ് എയർവേസ് യാത്രികരോട് മാപ്പ് പറഞ്ഞിട്ടുണ്ട്. സുരക്ഷിതമായി എന്ന പൂർണ ബോദ്ധ്യം വരാതെ യാത്രികരുമായി പറക്കില്ലെന്ന് ബ്രിട്ടീഷ് എയർവേസ് അറിയിച്ചു. വിമാനത്തിന് മുകളിലേക്ക് ഐസ് വീണ നിമിഷം മുതൽ യാത്രികരെ സുരക്ഷിതരായി താഴെയിറക്കാനുള്ള പ്രയത്‌നത്തിലായിരുന്നു തങ്ങളുടെ എൻജിനീയർമാർ. സംഭവത്തെ തുടർന്ന് ക്ഷമയോടെ സഹകരിച്ച യാത്രികർക്കും ജീവനക്കാർക്കും നന്ദി അറിയിക്കുന്നുവെന്നും ബ്രിട്ടീഷ് എയർവേസ് വ്യക്തമാക്കി.