കൊറോണ പ്രതിസന്ധി മറികടക്കാൻ പ്രത്യേക പാക്കേജ് വേണം ; കേന്ദ്രത്തോട് കൈ നീട്ടി കേരളം

തിരുവനന്തപുരം : കൊറോണ പ്രതിസന്ധി മറികടക്കാൻ കേന്ദ്രത്തോട് കൈനീട്ടി കേരളം. സംസ്ഥാനത്തിനായി കേന്ദ്രത്തോട് പ്രത്യേക പാക്കേജ് ആവശ്യപ്പെട്ടതായി ധനമന്ത്രി കെ.എൻ ബാലഗോപാൽ വാർത്താ സമ്മേളനത്തിൽ പറഞ്ഞു. പ്രതിസന്ധി മറികടക്കാൻ ജിഎസ്ടി നഷ്ടപരിഹാരം നീട്ടണമെന്നും ആവശ്യപ്പെട്ടതായി ധനമന്ത്രി വ്യക്തമാക്കി.

ജിഎസ്ടി നഷ്ടപരിഹാരം അഞ്ച് വർഷത്തേക്ക് കൂടി നീട്ടണമെന്നാണ് ആവശ്യപ്പെട്ടിരിക്കുന്നത്. സംസ്ഥാനങ്ങളുടെ കടമെടുപ്പ് പരിധി മൂന്ന് ശതമാനം ആക്കുക, കേന്ദ്ര പദ്ധതികളിൽ കേരളത്തിന്റെ വിഹിതം വർദ്ധിപ്പിക്കുക, ദേശീയ ആരോഗ്യമിഷൻ ചിലവ് 100 ശതമാനവും കേന്ദ്രസർക്കാർ വഹിക്കുക എന്നീ ആവശ്യങ്ങളും കേന്ദ്രത്തിന് മുൻപാകെവെച്ചിട്ടുണ്ടെന്നും ബാലഗോപാൽ വ്യക്തമാക്കി. നിലവിൽ ആരോഗ്യമിഷൻ ചിലവിന്റെ 60 ശതമാനം കേന്ദ്രമാണ് വഹിക്കുന്നത്.

കെ റെയിൽ സിൽവർ ലൈൻ പദ്ധതി സംബന്ധിച്ചും കേന്ദ്രത്തോട് ചർച്ച നടത്തിയതായി അദ്ദേഹം പറഞ്ഞു. പദ്ധതിയ്‌ക്കുള്ള അനുമതി വേഗത്തിലാക്കണം. പദ്ധതി നടപ്പിലാക്കാൻ കേന്ദ്രസർക്കാരിന്റെ സാങ്കേതിക അനുമതി ലഭിക്കണം. ഇത് കൂടാതെ പ്രവാസികൾക്കായി പ്രത്യേക സാമ്പത്തിക പദ്ധതി നടപ്പാക്കണമെന്നും, തൊഴിലുറപ്പ് പദ്ധതി കൂടുതൽ വിപുലമാക്കണമെന്നും ആവശ്യപ്പെട്ടിട്ടുണ്ടെന്നും അദ്ദേഹം വിശദമാക്കി.