ന്യൂഡല്‍ഹി: അമേരിക്കയിലെ കെന്നഡി എയര്‍പോര്‍ട്ടിനു പുറത്ത് ഇന്ത്യന്‍വംശജനായ സിഖ് ഡ്രൈവര്‍ക്ക് അജ്ഞാതന്റെ വിദ്വേഷ ആക്രമണം. ടാക്‌സിയില്‍ മുട്ടി വിളിച്ച് അസഭ്യംപറയുന്നതും പുറത്തിറങ്ങിയ ഇയാളെ അക്രമിക്കുന്നതും വീഡിയോയില്‍ കാണം. തുടര്‍ന്ന് അല്‍പം മുന്‍പോട്ട് പോയശേഷം തിരിച്ചുവന്ന് വീണ്ടും ആക്രമിക്കുന്നതും വീഡിയോയില്‍ ദൃശ്യമാണ്. ഈ വീഡിയോ സമൂഹമാധ്യമത്തില്‍ വ്യാപകമായി പ്രചരിക്കുന്നുണ്ട്. നവ്‌ജോത് പാല്‍കൗര്‍ എന്നയാളാണ് 26 സെക്കന്‍ഡ് വീഡിയോ ട്വിറ്ററില്‍ പോസ്റ്റ് ചെയ്തത്.
ജോണ്‍ എഫ് കെന്നഡിയിലെ ഒരാള്‍ പകര്‍ത്തിയ ചിത്രമാണ് ഇതെന്നും ഇതിന്റെ ആധികാരിക എത്രമാത്രമുണ്ടെന്ന് വ്യക്തമല്ലെന്നും കുറിച്ച ഇയാള്‍ അമേരിക്കയില്‍ സിഖ് വംശജര്‍ക്കെതിരെ തുടര്‍ച്ചയായി അക്രമം നടക്കുന്നതായും അക്കാര്യം ഉയര്‍ത്തിക്കൊണ്ടുവരാനാണ് ഈ വീഡിയോ പോസ്റ്റ് ചെയ്യുന്നതെന്നും ട്വിറ്ററില്‍ കുറിച്ചു.
സംഭവത്തില്‍ അതൃപ്തി അറിയിച്ച ഇന്ത്യയുടെ കോണ്‍സുലേറ്റ് ജനറല്‍ ഇക്കാര്യം യുഎസ് അതോറിറ്റിയെ അറിയിച്ചതായും ഇത്തരം സംഭവങ്ങള്‍ക്കെതിരെ അന്വേഷണം ആവശ്യപ്പെട്ട്തായും അദ്ദേഹം ട്വീറ്റ് ചെയ്തു.
വംശീയഅധിക്ഷേപവും വിദ്വേഷ അക്രമവും അസ്വസ്ഥതപ്പെടുത്തുന്നതായും യുഎസിന്റെ വൈവിധ്യത്തെ ദുര്‍ബലപ്പെടുത്തുന്ന ഒന്നും പ്രോത്സാഹിപ്പിക്കില്ലെന്നും സൗത്ത് ആന്‍ഡ് സെന്‍ട്രല്‍ ഏഷ്യന്‍ അഫയേഴ്‌സ് ബ്യൂറോ വ്യക്തമാക്കി. വിദ്വേഷഅക്രമം നടത്തുന്നവരെ സംരക്ഷിക്കില്ലെന്നും അവര്‍ പറഞ്ഞു. 2017 ലും 2019ലും സമാനസംഭവങ്ങള്‍ അരങ്ങേറിയിരുന്നു.
Comments