ഹൈദരാബാദ് : ബാഡ്മിന്റൺ താരം സൈന നെഹ്വാളിന്റെ ട്വീറ്റിനെതിരെ ലൈംഗിക ചുവയോടെ പ്രതികരിച്ച നടൻ സിദ്ധാർത്ഥിനെതിരെ ദേശീയ വനിതാ കമ്മീഷൻ. സിദ്ധാർത്ഥിന് നോട്ടീസ് അയച്ചു. നടൻ ഉപയോഗിച്ച വാക്ക് സ്ത്രീവിരുദ്ധമാണെന്ന് ചൂണ്ടിക്കാട്ടിയാണ് നോട്ടീസ് നൽകിയത്. സംഭവത്തിൽ സിദ്ധാർത്ഥിനെതിരെ വനിതാ കമ്മീഷൻ നിയമനടപടി സ്വീകരിക്കുമെന്നാണ് വിവരം.
ഇന്നലെയാണ് സിദ്ധാർത്ഥ് സൈന നെഹ്വാളിന്റെ ട്വീറ്റിനെതിരെ അശ്ലീല ചുവയോടെ പ്രതികരിച്ചത്. പ്രധാനമന്ത്രിയുടെ പഞ്ചാബ് സന്ദർശനത്തിനിടെ സുരക്ഷാ വീഴ്ചയുണ്ടായതിനെ വിമർശിച്ചുകൊണ്ടായിരുന്നു സൈന നെഹ്വാളിന്റെ ട്വീറ്റ്. ഇതിനോട് ആയിരുന്നു സിദ്ധാർത്ഥിന്റെ പ്രതികരണം. ഷട്ടിൽ കോക്കിനെ വളച്ചൊടിച്ച് പുരുഷ ലൈംഗികാവയവത്തോട് അർത്ഥം വരുന്ന പദമാണ് സിദ്ധാർത്ഥ് ഉപയോഗിച്ചത്.
ട്വീറ്റ് ചെയ്ത് അൽപ്പ നിമിഷങ്ങൾക്കുള്ളിൽ തന്നെ ഇതിന്റെ സക്രീൻ ഷോട്ടുമായി ആളുകൾ രംഗത്ത് എത്തി. പ്രശസ്ത കായിക താരത്തോട് മോശമായി പ്രതികരിച്ച നടനെതിരെ പ്രതിഷേധം ആളിക്കത്തി. ഇതേ തുടർന്നാണ് വനിതാ കമ്മീഷൻ ഇടപെട്ടത്.
സ്വന്തം പ്രധാനമന്ത്രിയുടെ സുരക്ഷാവീഴ്ചയിൽ വിട്ടുവീഴ്ച ചെയ്താൽ ഒരു രാജ്യത്തിനും സുരക്ഷിതത്വം അവകാശപ്പെടാനാവില്ലെന്നായിരുന്നു സൈന യുടെ ട്വീറ്റ്. പ്രധാനമന്ത്രിക്കെതിരെ അരാജകവാദികളുടെ ഭീരുത്വം നിറഞ്ഞ അക്രമമെന്നായിരുന്നു സൈന നെഹ്വാളിന്റെ ട്വീറ്റ്.
