ജൊഹാനസ്ബർഗ് : ദക്ഷിണാഫ്രിക്കയിലെ സുലു രാജാവിന്റെ പിന്തുടർച്ചാവകാശത്തിനായി നിയമയുദ്ധം . ആറു ഭാര്യമാരും , 28 മക്കളുമാണ് സുലുരാജാവിനുള്ളത് . തങ്ങളുടെ വിവാഹം മാത്രമാണ് നിയമപരമായി നടന്നതെന്നും ബാക്കി അഞ്ചുവിവാഹങ്ങൾ പരമ്പരാഗത ആചാരപ്രകാരമായിരുന്നെന്നും അവകാശപ്പെട്ട് ആദ്യ ഭാര്യ സിബോംഗിൽ ദാൽമിനി കോടതിയിലെത്തി.രാജാവിന്റെ ഏക നിയമാനുസൃത വിധവ താനാണെന്നാണ് സിബോംഗിൽ വാദിക്കുന്നത് .
സിബോംഗിൽ രാജ്ഞിയുടെ രണ്ട് പെൺമക്കളായ രാജകുമാരി നതോംബിജോസുതുവും നാഥൻഡോയൻകോസിയും വിൽപത്രത്തിൽ തങ്ങളുടെ പങ്ക് അവകാശപ്പെട്ടിട്ടുണ്ട്. അവരും സിംഹാസനത്തിനായുള്ള മത്സരത്തിലാണ്. കഴിഞ്ഞ വർഷം മാർച്ചിലാണ് സുലു രാജാവ് ഗുഡ്വിൽ സ്വെലിത്തിനി രാജാവ് മരണപ്പെട്ടത് .
ദക്ഷിണാഫ്രിക്കയിലെ ജനസംഖ്യയുടെ അഞ്ചിലൊന്ന് വരുന്ന 11 ദശലക്ഷത്തിലധികം വരുന്ന സുലുക്കളുടെ അവകാശം തന്റെ പ്രിയപ്പെട്ട മൂന്നാമത്തെ ഭാര്യ ഷിയിവെ മാന്ത്ഫോംബി ദ്ലാമിനിയ്ക്ക് നൽകി ഗുഡ്വിൽ സ്വെലിത്തിനി വിൽപ്പത്രം തയ്യാറാക്കിയിരുന്നു .എന്നാൽ, മാന്ത്ഫോംബിയുടെ അപ്രതീക്ഷിത മരണത്തെത്തുടർന്ന് കിരീടധാരണം നടന്നില്ല.
സുലു രാജാവിന് എക്സിക്യൂട്ടീവ് അധികാരമില്ലെങ്കിലും തന്റെ പ്രജകളുടെ മേൽ അദ്ദേഹത്തിന് വലിയ ധാർമ്മിക സ്വാധീനം ഉണ്ടായിരുന്നു. ഹെക്ടർ കണക്കിന് ഭൂമിയും നിരവധി കൊട്ടാരങ്ങളും മറ്റ് സ്വത്തുക്കളും അദ്ദേഹത്തിന്റെ ഉടമസ്ഥതയിലായിരുന്നു.
