നരേന്ദ്ര മോദിയുടെ നിശ്ചദാർഢ്യവും പരിശ്രമവും; ജനങ്ങളുടെ ഐക്യത്തോടെയുള്ള പ്രവർത്തനം; വാക്‌സിൻ വിതരണത്തിൽ ഇന്ത്യ ലോകത്തിന് മാതൃകയായെന്ന് അമിത് ഷാ

ന്യൂഡൽഹി : ഇന്ത്യയിലെ കൊറോണ വാക്‌സിനേഷൻ വിജയകരമായി ഒരു വർഷം പൂർത്തിയാക്കിയതിൽ പ്രധാനമന്ത്രിയ്‌ക്കും ആരോഗ്യപ്രവർത്തകർക്കും നന്ദിയറിയിച്ച് കേന്ദ്ര ആഭ്യന്തര മന്ത്രി അമിത് ഷാ. ജനങ്ങളും സർക്കാരും ഒന്നിച്ച് നിന്നാൽ എല്ലാ പ്രതിസന്ധികളെയും തരണം ചെയ്യാൻ സാധിക്കുമെന്ന് കാട്ടിക്കൊടുത്തുകൊണ്ട് ഇന്ത്യ ലോകത്തിന് മാതൃകയായിരിക്കുകയാണെന്ന് അദ്ദേഹം പറഞ്ഞു. വാക്‌സിനേഷൻ ആരംഭിച്ച് ഒരു വർഷം പൂർത്തിയായപ്പോൾ രാജ്യത്ത് 156.76 കോടി വാക്‌സിൻ ഡോസുകളാണ് നൽകിയത്.

പ്രധാനമന്ത്രിയുടെ നേതൃത്വവും നിശ്ചയദാർഢ്യവും നിരന്തര പരിശ്രമവും രാജ്യത്തിന് ഈ നേട്ടം കൈവരിക്കാൻ ഇടയാക്കി. എല്ലാവരും ചേർന്ന് ഒരു പൊതു ലക്ഷ്യത്തിനു വേണ്ടി ഒരുമിക്കുകയും രാജ്യ താൽപര്യം മുൻനിർത്തി പ്രവർത്തിക്കുകയും ചെയ്താൽ ഏത് അസാധ്യ കാര്യവും സാധ്യമാകുമെന്നും ഏത് വെല്ലുവിളിയെയും തോൽപിക്കാമെന്നും ലോകത്തിന് ഇന്ത്യ കാണിച്ചുകൊടുത്തുവെന്നും അദ്ദേഹം ട്വിറ്ററിൽ കുറിച്ചു.

കൊറോണയ്‌ക്കെതിരെ മുന്നിൽ നിന്ന് പോരാടിയ ഗവേഷകർ, ആരോഗ്യ പ്രവർത്തകർ, കൊറോണ മുൻനിര പോരാളികൾ എന്നിവരെയും അമിത് ഷാ അഭിനന്ദിച്ചു. ലോകത്തെ ഏറ്റവും വലിയ സൗജന്യ വാക്‌സിനേഷൻ വിജയകരമായി ഒരു വർഷം പൂർത്തീകരിച്ചതിന് കൊറോണ മുന്നണി പോരാളികളെയും ശാസ്ത്രജ്ഞരെയും അഭിനന്ദിക്കുന്നുവെന്ന് അദ്ദേഹം പറഞ്ഞു.

കേന്ദ്ര ആരോഗ്യമന്ത്രാലയത്തിന്റെ കണക്കുകൾ പ്രകാരം അർഹരായ ജനസംഖ്യയുടെ 92 ശതമാനം ആളുകൾ ആദ്യ ഡോസ് വാക്സിൻ സ്വീകരിച്ചിട്ടുണ്ട്. കൂടാതെ 68 ശതമാനം ആളുകളും രണ്ട് ഡോസ് വാക്സിനും സ്വീകരിച്ചു കഴിഞ്ഞു.