രാജ്യത്തിന്റെ സ്വാതന്ത്ര്യത്തിനും അഭിമാനത്തിനും വേണ്ടി വെള്ളക്കാരനോട് യാചിക്കാന്‍ നേതാജി എന്ന് സ്‌നേഹപൂര്‍വ്വം വിളിക്കുന്ന സുഭാഷ് ചന്ദ്രബോസ് തയ്യാറായിരുന്നില്ല.അവര്‍ തരുന്നതിനായി കാത്തു നില്‍ക്കാനും അദ്ദേഹത്തിന് മനസ്സുണ്ടായിരുന്നില്ല. ബ്രിട്ടീഷ് ആധിപത്യം കൊടികുത്തി വാഴുകയും വൈസ്രോയിമാരും ഗവര്‍ണര്‍ ജനറല്‍മാരും ഭരണകൂടമാവുകയും അവര്‍ നിയോഗിക്കുന്ന കമ്മിഷനുകള്‍ക്കും അവരുണ്ടാക്കുന്ന കരാറുകള്‍ക്കും അനുസരിച്ച് സ്വാതന്ത്ര്യസമരങ്ങള്‍ നിര്‍ത്തുകയും നീട്ടുകയും നടത്തുകയും ചെയ്ത കാലത്ത് അതിന് നിന്ന് കൊടുക്കുകയായിരുന്നില്ല സുഭാഷ് ചന്ദ്രബോസ്. അദ്ദേഹം അതിനും മുകളില്‍ കൊടി നാട്ടുകയായിരുന്നു.
നേതാജിയുടെ നേതൃത്വത്തില്‍ രൂപംകൊണ്ട ആസാദ് ഹിന്ദ് ഫൗജിലൂടെ രാജ്യം ആദ്യത്തെ സ്വതന്ത്ര സര്‍ക്കാരിനെ കണ്ടു. മുഗളാധിപത്യത്തിന്റെ കാലത്ത് വിമോചനത്തിന്റെ കൊടി ഉയര്‍ത്തി ഹിന്ദുസാമ്രാജ്യം സ്ഥാപിച്ച വീര ശിവാജിയുടെ വിപ്‌ളവ മാതൃക എങ്ങനെയായിരുന്നുവോ അതിനെ അനുസ്മരിപ്പിക്കുന്നതായിരുന്നു സുഭാഷിന്റെ ശ്രമങ്ങളും.സുഭാഷ് ചന്ദ്രബോസ് സര്‍ക്കാരുണ്ടാക്കി,അവര്‍ ആയുധ പരിശീലനം നേടി സായുധരായി.സ്വന്തം സൈന്യമുണ്ടാക്കി യുദ്ധസജ്ജരായി. ജപ്പാനും ജര്‍മ്മനിയുമടക്കമുള്ള വിദേശരാജ്യങ്ങളുമായി നയതന്ത്ര ബന്ധങ്ങളുണ്ടാക്കി ബ്രിട്ടീഷുകാരനോട് രാജ്യം വിട്ടു പോകാന്‍ ആജ്ഞാപിച്ചു. അല്ലെങ്കില്‍ യുദ്ധത്തിനൊരുങ്ങാന്‍ താക്കീത് നല്‍കി.
സ്വാതന്ത്ര്യത്തിന്റെ സ്വാഭിമാനത്തിന്റെ മറുപേരായി സുഭാഷ് ചന്ദ്രബോസ്. ഭയന്നു പോയത് വെള്ളക്കാര്‍ മാത്രമായിരുന്നില്ല, എറിഞ്ഞു കിട്ടുന്ന അധികാര ഭിക്ഷയില്‍ കണ്ണുനട്ടിരുന്ന കപടനായകരും അതില്‍ ഉള്‍പ്പെടും. ബ്രിട്ടീഷുകാര്‍ ഇരുട്ടിലാക്കിയ ജനതയ്‌ക്ക് വെളിച്ചമായി ജ്വലിച്ച നേതാജിയെ സ്വാതന്ത്ര്യാനന്തരം ചിലര്‍ ഇരുളിള്‍ നിര്‍ത്താന്‍ ശ്രമിച്ചു. ദുരൂഹവും ദുസ്സഹവുമായ ആ തിരോധാനത്തിന്റെ രേഖകള്‍ പോലും മറച്ചു പിടിച്ചു. തലമുറകളില്‍ നിന്നു യാഥാര്‍ത്ഥ്യം മറച്ചുപിടിക്കാന്‍ പടമായും പാഠമായും അല്പം ചിലത് മാത്രം അറിയിച്ചു.
എന്നിട്ടും കെടാവിളക്കായി സുഭാഷ് ജ്വലിച്ചു നിന്നു. തമസ്‌കരണത്തിന്റെ കൂരിരുള്‍ കൊണ്ട് മറയ്‌ക്കാന്‍ ശ്രമിച്ചിട്ടും അനുദിനം സൂര്യതേജസ്സായി ഉദിച്ചു നില്‍ക്കുകയാണ്, തലമുറകളിലേക്ക്. രാജ്യം നന്ദിയോടെ ഓര്‍ക്കുകയാണ് നേതാജി യഥാര്‍ത്ഥ നേതാവ്.
Comments