ആഗോളതലത്തിൽ ഏറ്റവും മൂല്യമേറിയ 3 ഐടി സേവന ബ്രാൻഡുകളിൽ ടിസിഎസും ഇൻഫോസിസും, ഐബിഎമ്മിനെ പിന്തള്ളി

ന്യൂഡൽഹി: ലോകമെമ്പാടുമുള്ള ഏറ്റവും മൂല്യവത്തായ മൂന്ന് ഐടി സേവന ബ്രാൻഡുകളിൽ രണ്ടെണ്ണം ഇന്ത്യയിൽ നിന്ന്. ലോകത്തെ മുൻനിര ബ്രാൻഡ് മൂല്യനിർണ്ണയ സ്ഥാപനമായ ബ്രാൻഡ് ഫിനാൻസിന്റെ വാർഷിക റിപ്പോർട്ടിൽ ടാറ്റ കൺസൾട്ടൻസി സർവീസസും (ടിസിഎസ്), ഇൻഫോസിസും ഐബിഎമ്മിനെ പിന്തള്ളി യഥാക്രമം രണ്ടും മൂന്നും സ്ഥാനങ്ങളിൽ എത്തി. ലോകത്തിലെ ഏറ്റവും മൂല്യമേറിയതും ശക്തവുമായ ഐടി സേവന ബ്രാൻഡ് എന്ന പദവി തുടർച്ചയായ നാലാം വർഷവും ആക്‌സഞ്ചർ നിലനിർത്തി.

മൊത്തത്തിലുള്ള ബ്രാൻഡ് മൂല്യം അളക്കുന്നതിനു പുറമേ, മാർക്കറ്റിംഗ് നിക്ഷേപം, ഉപഭോക്തൃ പരിചയം, ജീവനക്കാരുടെ സംതൃപ്തി, കോർപ്പറേറ്റ് പ്രശസ്തി തുടങ്ങിയ ഘടകങ്ങളെ അടിസ്ഥാനമാക്കിയാണ് ബ്രാൻഡ് ഫിനാൻസിന്റെ വിലയിരുത്തൽ. ബ്രാൻഡ് ഫിനാൻസ് ഗ്ലോബൽ 500 2022 റിപ്പോർട്ടിൽ, ലോകത്തിലെ ഏറ്റവും വേഗത്തിൽ വളരുന്ന ഐടി സേവന ബ്രാൻഡായും ആഗോളതലത്തിൽ ഏറ്റവും വേഗത്തിൽ വളരുന്ന 25 ബ്രാൻഡുകളിലൊന്നായും ഇൻഫോസിസ് അംഗീകരിക്കപ്പെട്ടു.

റാങ്കിംഗിൽ ഇൻഫോസിസ് 56 സ്ഥാനങ്ങൾ ഉയർന്നതോടെ, വാർഷിക ബ്രാൻഡ് മൂല്യം 52 ശതമാനം വർധിച്ച് 12.8 ബില്യൺ ഡോളറിലെത്തി. ബ്രാൻഡ് മൂല്യത്തിലുളള കരുത്തും വളർച്ചയാണ് റിപ്പാർട്ടിൽ സൂചിപ്പിക്കുന്നതെന്ന് കമ്പനി പ്രസ്താവനയിൽ പറഞ്ഞു. മഹാമാരിയുടെ കാലത്ത് ലോകമെമ്പാടുമുള്ള ഒരു ഡിജിറ്റൽ പരിവർത്തനത്തിന്റെ ആവശ്യകതയ്‌ക്ക് പ്രേരിപ്പിച്ചപ്പോൾ, ഇൻഫോസിസ് വെല്ലുവിളി ഏറ്റെടുത്തുവെന്ന് ബ്രാൻഡ് ഫിനാൻസ് ചെയർമാനും സിഇഒയുമായ ഡേവിഡ് ഹെയ് പറഞ്ഞു.

ഇൻഫോസിസ് റാങ്കിങിൽ വൻ കുതിച്ചുചാട്ടം നടത്തിയപ്പോൾ, ലോകത്തിലെ ഏറ്റവും മൂല്യവത്തായ രണ്ടാമത്തെ ഐടി ബ്രാൻഡായി റാങ്ക് ചെയ്യപ്പെടാൻ ടിസിഎസിന് കഴിഞ്ഞു. ടാറ്റ സൺസിന്റെ ചെയർമാൻ എൻ ചന്ദ്രശേഖരനെ പത്മഭൂഷൺ പുരസ്‌കാര ജേതാവായി കേന്ദ്രസർക്കാർ പ്രഖ്യാപിച്ചതിന് തൊട്ടുപിന്നാലെയാണ് ടിസിഎസിന്റെ ബ്രാൻഡിങ്ങിലുണ്ടായ മുന്നേറ്റവുമെന്നത് ശ്രദ്ധേയമാണ്. ബ്രാൻഡ് ഫിനാൻസിന്റെ ലോകത്തിലെ ഏറ്റവും മികച്ച 250 സിഇഒമാരുടെ ബ്രാൻഡ് ഗാർഡിയൻഷിപ്പ് ഇൻഡക്സ് 2022ൽ ആഗോളതലത്തിൽ 25ാം സ്ഥാനത്താണ് ചന്ദ്രശേഖരൻ. റാങ്കിങ് പ്രകാരം ഇന്ത്യയിലെ ഏറ്റവും മികച്ച സിഇഒ ആണ് എൻ ചന്ദ്രശേഖരൻ.

ഏറ്റവും പുതിയ ബ്രാൻഡ് ഫിനാൻസ് റിപ്പോർട്ട് പ്രകാരം ടിസിഎസിന്റെ ബ്രാൻഡ് മൂല്യം 1.844 ബില്യൺ ഡോളർ വർദ്ധിച്ചതായി കണ്ടെത്തി. മുൻവർഷത്തെ അപേക്ഷിച്ച് 12.5 ശതമാനമാണ് വർധനവ്. 2022ൽ അതിന്റെ ബ്രാൻഡ് മൂല്യം 16.8 ബില്യൺ ഡോളറാണ്. ന്യൂയോർക്ക് സിറ്റി മാരത്തൺ, ലണ്ടൻ മാരത്തൺ, ടൊറന്റോ മാരത്തൺ, ജാഗ്വാർ ടിസിഎസ് റേസിംഗ് ടീം എന്നിവയുൾപ്പെടെയുള്ള കായിക ഇനങ്ങളിലെ സ്‌പോൺസർഷിപ്പുകളും പങ്കാളിത്തവും കാരണം ആഗോളതലത്തിൽ ഏറ്റവും അംഗീകൃത ഇന്ത്യൻ ബ്രാൻഡുകളിലൊന്നാണ് ടിസിഎസ്. ലോകത്തിലെ ഏറ്റവും മികച്ച 250 സിഇഒമാരുടെ ബ്രാൻഡ് ഫിനാൻസ് ബ്രാൻഡ് ഗാർഡിയൻഷിപ്പ് ഇൻഡക്സ് 2022ൽ മൈക്രോസോഫ്റ്റിന്റെ സത്യ നാദെല്ല ഒന്നാമതെത്തി.