ന്യൂഡൽഹി: എൻസിസിയെ ശക്തിപ്പെടുത്താൻ കേന്ദ്രസർക്കാർ നിരവധി പദ്ധതികളാണ് നടപ്പിലാക്കിയതെന്ന് പ്രധാനമന്ത്രി നരേന്ദ്രമോദി. റിപ്പബ്ലിക് ദിനാഘോഷങ്ങളുടെ സമാപനങ്ങളോട് അനുബന്ധിച്ച് കരിയപ്പ പരേഡ് ഗ്രൗണ്ടിൽ നടക്കുന്ന റാലിയിൽ രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. ഇന്ന് നടന്ന റാലിയിൽ നിരവധി പെൺകുട്ടികളാണ് പങ്കെടുത്തത്. ഇതാണ് ഇന്ത്യ കണ്ട മാറ്റമെന്ന് പ്രധാനമന്ത്രി പറഞ്ഞു. എൻസിസിയുടെ ഒരു സജീവ അംഗമായിരുന്നു എന്നതിൽ അഭിമാനം തോന്നുന്നുവെന്നും പ്രധാനമന്ത്രി കൂട്ടിച്ചേർത്തു.
രാജ്യത്തെ എൻസിസി കേഡറ്റുകളുടെ നിശ്ചയദാർഢ്യവും പിന്തുണയും കൊണ്ട് ഇന്ത്യയുടെ ഭാവി മാറ്റാൻ കഴിയുമെന്നും പ്രധാനമന്ത്രി പറഞ്ഞു. കഴിഞ്ഞ രണ്ട് വർഷമായി ഒരുലക്ഷത്തിൽ അധികം എൻസിസി കേഡറ്റുകളെയാണ് അതിർത്തി പ്രദേശത്ത് വിന്യസിച്ചിട്ടുള്ളത്. യുവാക്കളിൽ അധികമായി കാണുന്ന മയക്കുമരുന്നിനെതിരെ എല്ലാവരും പ്രവർത്തിക്കണമെന്നും കേഡറ്റുകളോട് പ്രധാനമന്ത്രി ആവശ്യപ്പെട്ടു.
റിപ്പബ്ലിക് ദിന ക്യാമ്പിന്റെ സമാപന റാലി എല്ലാ വർഷവും ജനുവരി 28 ന് സംഘടിപ്പിക്കാറുണ്ട്. ഗാർഡ് ഓഫ് ഓണർ സ്വീകരിച്ച പ്രധാനമന്ത്രി എൻസിസി കേഡറ്റുകളുടെ മാർച്ച് പാസ്റ്റ് അവലോകനം ചെയ്തു. കൂടാതെ ആർമി ആക്ഷൻ, പാരാസെയിലിംഗ് തുടങ്ങിയ എൻസിസി കേഡറ്റുകളുടെ പരിപാടികൾക്കും പ്രധാനമന്ത്രി സാക്ഷ്യം വഹിച്ചു.
Comments