ചിപ്പുകള്‍ ഘടിപ്പിച്ച ഇ പാസ്‌പോര്‍ട്ടുകള്‍ ; 75 പുതിയ ഡിജിറ്റല്‍ ബാങ്കിംഗ് യൂണിറ്റുകള്‍; ഡിജിറ്റല്‍ ഇന്ത്യയ്‌ക്ക് പ്രാധാന്യം

ന്യൂഡൽഹി : ഇ പാസ്‌പോർട്ട് പദ്ധതി പ്രഖ്യാപിച്ച് ധനമന്ത്രി. 2022-23 സാമ്പത്തിക വർഷത്തിൽ പദ്ധതി നടപ്പിലാക്കും. സാങ്കേതിക വിദ്യകൾ ഉപയോഗിച്ച് രൂപീകരിക്കുന്ന ഇ പാസ്‌പോർട്ടുകൾ ജനങ്ങൾക്ക് സൗകര്യപ്രദമാകുമെന്നാണ് വിലയിരുത്തൽ. പ്രത്യേക സാമ്പത്തിക മേഖല പ്രഖ്യാപിക്കുന്നതിനായി പുതിയ നിയമം കൊണ്ടുവരുമെന്നും ധനകാര്യമന്ത്രി ബജറ്റ് അവതരണത്തിൽ പറഞ്ഞു.

ഡിജിറ്റൽ ബാങ്കിംഗ് സൗകര്യം കൂടുതൽ ജനങ്ങളിലേക്ക് എത്തിക്കാൻ രാജ്യത്ത് കൂടുതൽ ഡിജിറ്റൽ ബാങ്കിംഗ് യൂണിറ്റുകൾ ആരംഭിക്കും. രാജ്യത്തെ 75 ജില്ലകളിലായി വാണിജ്യ ബാങ്കുകൾ വഴി 75 ബാങ്കിംഗ് യൂണിറ്റുകളാണ് ആരംഭിക്കുക. ഡിജിറ്റൽ പേയ്മെന്റിനുളള സാമ്പത്തിക സഹായം തുടരും. ഇത് ഓൺലൈനായി പണമിടപാടുകൾ നടത്താൻ കൂടുതൽ പ്രോത്സാഹനം നൽകുമെന്നും ധനമന്ത്രി വ്യക്തമാക്കി.

ബിൽ അടയ്‌ക്കുന്നതുമായി ബന്ധപ്പെട്ട പ്രശ്‌നങ്ങൾ പരിഹരിക്കുന്നതിനായി ഓൺലൈൻ ബിൽ സിസ്റ്റം ലോഞ്ച് ചെയ്യും. എല്ലാ കേന്ദ്ര വകുപ്പുകളും ഇത് ഉപയോഗിക്കുമെന്നും ധനകാര്യമന്ത്രി ബജറ്റ് അവതരണത്തിൽ പ്രഖ്യാപിച്ചു.

ബ്ലോക്ക് ചെയിൻ അല്ലെങ്കിൽ മറ്റ് സാങ്കേതിക വിദ്യകൾ ഉപയോഗിച്ച് ഡിജിറ്റൽ മണി വിതരണം ചെയ്യും. 2022-23 സാമ്പത്തിക വർഷത്തിൽ ആർബിഐ ആണ് ഇത് പുറത്തിറക്കുക. രാജ്യത്തിന്റെ സമ്പദ് വ്യവസ്ഥയ്‌ക്ക് ഇത് വലിയ ഉത്തേജനം നൽകുമെന്നും ധനമന്ത്രി അറിയിച്ചു.