തിരുവനന്തപുരം: സംസ്ഥാനത്തെ കൊറോണ സാഹചര്യം വിലയിരുത്താൻ ഇന്ന് അവലോകന യോഗം ചേരും. മുഖ്യമന്ത്രിയുടെ അധ്യക്ഷതയിൽ രാവിലെ 11 മണിയ്‌ക്ക് ഓൺലൈനായാണ് യോഗം ചേരുന്നത്.
കൊറോണ വ്യാപനം കുറഞ്ഞ തിരുവനന്തപുരം അടക്കമുള്ള ജില്ലകളെ സി കാറ്റഗറിയിൽ നിന്നും ഒഴിവാക്കുന്നത് സംബന്ധിച്ച കാര്യങ്ങൾ യോഗം ചർച്ച ചെയ്യും. ഞായറാഴ്ചകളിലെ ലോക്ക്ഡൗണിന് സമാനമായ നിയന്ത്രണം തുടരാൻ കഴിഞ്ഞ അവലോകന യോഗത്തിൽ തീരുമാനമായിരുന്നു. ഇതിൽ മാറ്റം ഉണ്ടാകുമോ എന്നും ഇന്ന് അറിയാം. ജില്ലകളെ കാറ്റഗറികളായി തിരിച്ചുള്ള നിയന്ത്രണങ്ങൾ തുടർന്നേക്കും.
നിലവിൽ തിരുവനന്തപുരം, ഇടുക്കി, പത്തനംതിട്ട, കൊല്ലം, കോട്ടയം എന്നീ ജില്ലകളാണ് സി കാറ്റഗറിയിലുള്ളത്. മൂന്നാം തരംഗത്തിൽ ആദ്യമായി ആക്ടീവ് രോഗികളുടെ എണ്ണം ഇന്നലെ കുറഞ്ഞിരുന്നു. അതേസമയം, കേരളത്തിലെ കൊറോണ വ്യാപന കണക്കുകളിൽ കേന്ദ്ര ആരോഗ്യമന്ത്രാലയം ആശങ്ക അറിയിച്ചിരുന്നു.
Comments