അടിയ്‌ക്ക് തിരിച്ചടിയുമായി എടികെ; അവസാന മിനുട്ടിൽ നേടിയ ഗോളിൽ ബ്ലാസ്റ്റേഴ്സിനെ സമനിലയിൽ കുരുക്കി കൊൽക്കത്ത

പനാജി: ഇന്ത്യൻ സൂപ്പർ ലീഗിൽ എടികെ മോഹൻ ബഗാനും കേരളാ ബ്ലാസ്റ്റേഴ്‌സും തമ്മിലുള്ള പോരാട്ടം സമനിലയിൽ. ഇരു ടീമുകളും രണ്ട് ഗോൾ വീതം നേടി. ക്യാപ്റ്റൻ അഡ്രിയാൻ ലൂണയാണ്(7,64) ബ്ലാസ്റ്റേഴ്‌സിനായി ഗോളുകൾ നേടിയത്.

പോരാട്ടത്തിൽ രണ്ട് തവണ ബ്ലാസ്‌റ്റേഴ്‌സ് മുന്നിട്ട് നിന്നെങ്കിലും, കരുത്തരായ എടികെ ഗോളുകൾ മടക്കി നൽകി സമനില നേടുകയായിരുന്നു. എടികെയ്‌ക്കായി ഡേവിഡ് വില്യംസ്(8), ജോനി കൗക്കോ(97) എന്നിവർ ഗോൾ മടക്കി. 30 പോയിന്റുമായി എടികെ പട്ടികയിൽ ഒന്നാം സ്ഥാനത്താണുള്ളത്. കേരള ബ്ലാസ്റ്റേഴ്‌സ് ഒട്ടും പിന്നിലല്ല. 27 പോയിന്റുമായി നാലാം സ്ഥാനത്താണ് ബ്ലാസ്‌റ്റേഴ്‌സ്.

ആവേശകരമായ ആദ്യ പകുതിയിൽ ഇരു ടീമും ഓരോ ഗോൾ വീതം നേടി പിരിഞ്ഞു. ലൂണ നേടിയ ഫ്രീകിക്ക് ഗോളിനു അടുത്ത മിനിറ്റിൽ തന്നെ എടികെ മറുപടി നൽകുകയായിരുന്നു. 7ാം മിനിറ്റിൽ സഹൽ നേടിയെടുത്ത ഫ്രീകിക്ക് ലൂണയാണ് എടുത്തത്. എടികെ തീർത്ത പ്രതിരോധ വേലിയ്‌ക്ക് മുകളിലൂടെ ലൂണയുടെ ഫ്രീകിക്ക് ഗോളായി മാറുകയായിരുന്നു.

ബ്ലാസ്‌റ്റേഴ്‌സ് ഗോൾ നേട്ടം ആഘോഷിച്ച് തീരും മുന്നേ തന്നെ തൊട്ടടുത്ത മിനിറ്റിൽ എടികെ സമനില ഗോൾ നേടി. ഡേവിഡ് വില്യംസണാണ് എടികെയ്‌ക്കായി ആദ്യത്തെ ഗോൾ നേടിയത്. ഇതോടെ മത്സരം സമനിലയിൽ പിരിഞ്ഞു.

രണ്ടാം പകുതിയിൽ 64ാം മിനിറ്റിലായിരുന്നു ലൂണയുടെ രണ്ടാം ഗോൾ. ഇതോടെ ബ്ലാസ്‌റ്റേഴ്‌സ് വീണ്ടും മുന്നിലെത്തി. 90-ാം മിനിറ്റിൽ ഗ്രൗണ്ടിലെ മോശം പെരുമാറ്റത്തിന് എടികെ താരം പ്രബീർ ദാസിന് ചുവപ്പ് കാർഡ് ലഭിച്ച് പുറത്താകേണ്ടി വന്നു. പിന്നീട് അധികമായി ലഭിച്ച ഏഴ് മിനിറ്റാണ് എടികെയ്‌ക്ക് ഗോൾ നേടിക്കൊടുത്തത്. 97-ാം മിനിറ്റിൽ ജോനി കൗക്കോയുടെ ഗോളിൽ എടികെ സമനില പിടിക്കുകയായിരുന്നു.