തിരുവനന്തപുരം; ഗവർണർ ആരിഫ് മുഹമ്മദ് ഖാന് പുതിയ കാർ വാങ്ങാൻ പണം അനുവദിച്ച് സംസ്ഥാന സർക്കാർ ഉത്തരവിറങ്ങി. 85 ലക്ഷം രൂപയാണ് ഗവർണർക്ക് കാർ വാങ്ങാനായി സർക്കാർ അനുവദിച്ചത്. ബെൻസ് കാറാണ് വാങ്ങുക. കാർ വാങ്ങുന്നത് സംബന്ധിച്ച് നേരത്തെ തന്നെ സർക്കാർ തീരുമാനം എടുത്തിരുന്നുവെങ്കിലും ഇന്നാണ് ഉത്തരവിറങ്ങിയത്.
ഇപ്പോൾ ഗവർണർ ഉപയോഗിക്കുന്ന ബെൻസിന് 12 വർഷത്തെ പഴക്കമുണ്ടെന്നാണ് വിവരം. ഒരു ലക്ഷം കിലോമീറ്റർ ഓടിയാൽ വിഐപി പ്രോട്ടോക്കോൾ പ്രകാരം വാഹനം മാറ്റാം. ഗവർണറുടെ വാഹനം നിലവിൽ ഒന്നരലക്ഷം കിലോമീറ്റർ ഓടിയിട്ടുണ്ട്.
താൻ കാർ ആവശ്യപ്പെട്ടിട്ടില്ലെന്ന് ഗവർണർ വ്യക്തമാക്കിയിരുന്നു. പുതിയ കാർ സർക്കാരിനോട് ആവശ്യപ്പെടണമെന്ന രാജ്ഭവൻ ഫയലിൽ താൻ നടപടിയെടുത്തിട്ടില്ല. ചുരുക്കം ചില യാത്രകളിലൊഴികെ ഒരുവർഷമായി ഉപയോഗിക്കുന്നത് ഭാര്യക്ക് അനുവദിച്ച വാഹനമാണ്. എത് വാഹനം വേണമെന്ന് സർക്കാരിന് തീരുമാനിക്കാമെന്നുമാണ് ഗവർണർ വ്യക്തമാക്കിയത്.
