പുടിനെതിരെ റഷ്യയിലും പ്രതിഷേധം; യുദ്ധത്തിനെതിരെ ആയിരകണക്കിന് റഷ്യൻ പൗരന്മാർ തെരുവിൽ; 1,700ഓളം പ്രതിഷേധക്കാർ അറസ്റ്റിൽ

മോസ്‌കോ: യുക്രെയ്‌നിൽ റഷ്യ അധിനിവേശം നടത്തി യുദ്ധം ആരംഭിച്ചതിൽ പ്രതിഷേധിച്ച് ആയിരക്കണക്കിന് റഷ്യൻ പൗരന്മാർ. ഇവരെ റഷ്യൻ ഭരണകൂടം അറസ്റ്റ് ചെയ്ത് നീക്കി.

യുദ്ധത്തിനെതിരായി സമൂഹമാദ്ധ്യമങ്ങളിലൂടെ പൊട്ടിപുറപ്പെട്ട പിന്തുണയും ആഹ്വാനവും പിന്നീട് റഷ്യൻ തെരുവകളിലേക്ക് എത്തുകയായിരുന്നു. ആദ്യം നൂറുക്കണക്കിനാളുകൾ അണിനിരന്നെങ്കിൽ പിന്നീടത് ആയിരക്കണക്കിനാളുകളായി മാറി. 53 റഷ്യൻ നഗരങ്ങളിലായി പ്രതിഷേധിച്ച 1,702 പേരെ പോലീസ് അറസ്റ്റ് ചെയ്ത് നീക്കി. ഇതിൽ 940 പ്രതിഷേധക്കാരും തലസ്ഥാന നഗരമായ മോസ്‌കോയിലാണ് അണിനിരന്നത്.

1979-ൽ സോവിയേറ്റ് യൂണിയൻ അഫ്ഗാനിസ്ഥാനിൽ നടത്തിയ അധിനിവേശത്തിന് ശേഷം മോസ്‌കോയുടെ ഭാഗത്ത് നിന്നുണ്ടാകുന്ന ഏറ്റവും ആക്രമണോത്സുകമായ നടപടിയെന്നാണ് പ്രതിഷേധക്കാർ വിശേഷിപ്പിച്ചത്. ഇതുമായി ബന്ധപ്പെട്ട് നൂറുക്കണക്കിന് പോസ്റ്ററുകൾ റഷ്യൻ നഗരങ്ങളിൽ പ്രത്യക്ഷപ്പെട്ടു.

എന്നാൽ കിഴക്കൻ യുക്രെയ്നിലെ സാധാരണക്കാരെ ‘വംശഹത്യയിൽ’ നിന്ന് സംരക്ഷിക്കുന്നതിനുള്ള ‘പ്രത്യേക സൈനിക നടപടി’യെഎന്നാണ് വ്ളാഡിമർ പുടിൻ വിശദമാക്കിയത്. ഈ അവകാശവാദം തെറ്റാണെന്ന് റഷ്യയുടെ അധിനിവേശത്തിന് മുമ്പേ യുഎസ് മുന്നറിയിപ്പ് നൽകിയിരുന്നെങ്കിലും ഭൂരിഭാഗം റഷ്യക്കാരും ഇക്കാര്യം അവഗണിച്ചിരുന്നു.

‘നമുക്കൊപ്പം എന്നന്നേക്കും നിലനിൽക്കുന്ന അപമാനം’ എന്ന് റഷ്യൻ നടപടിക്കെതിരെ മോസ്‌കോയിലെ പ്രതിപക്ഷ ആക്ടിവിസ്റ്റായ തത്യാന ഉസ്മാനോവ ഫേസ്ബുക്കിൽ കുറിച്ചു. യുക്രെയ്ൻ ജനതയോട് ക്ഷമ ചോദിക്കാൻ ആഗ്രഹിക്കുന്നു. യുദ്ധം അഴിച്ചുവിട്ടവർക്ക് വേണ്ടി ഞങ്ങൾ വോട്ട് ചെയ്തിട്ടില്ലെന്നും അവർ പറഞ്ഞു.

രാജ്യത്തെ പ്രമുഖ മനുഷ്യാവകാശ അഭിഭാഷകനായ ലെവ് പൊനോമവിയോവ് റഷ്യയുടെ നടപടിക്കെതിരെ ആരംഭിച്ച ഹർജി മണിക്കൂറുകൾക്കകം 1,50,000-ലധികം ഒപ്പുകൾ നേടി. ദിവസം അവസാനിക്കുന്നതോടെ ഒപ്പുകളുടെ എണ്ണം 289,000 ആയി. 250ലധികം മാദ്ധ്യമപ്രവർത്തകർ അവരുടെ പേരുകൾ തുറന്ന കത്തിൽ എഴുതി ആക്രമണത്തെ അപലപിച്ചു. 250-ഓളം ശാസ്ത്രജ്ഞരും ഹർജിയിൽ ഒപ്പുവച്ചു. മോസ്‌കോയിലും മറ്റ് പ്രധാന നഗരങ്ങളിലുമായി 194 മുനിസിപ്പൽ കൗൺസിൽ അംഗങ്ങളും യുക്രെയ്‌ന് പിന്തുണയറിയിച്ചു.