തിരവനന്തപുരം: അഞ്ച് സംസ്ഥാനങ്ങളിലേക്ക് നടന്ന നിയമസഭാ തിരഞ്ഞെടുപ്പിന്റെ വോട്ടെണ്ണൽ അന്തിമഘട്ടത്തിലേക്ക് എത്തിയപ്പോൾ ചിത്രത്തിലില്ലാതെ മാറിയിരിക്കുകയാണ് കോൺഗ്രസ് അഞ്ചിടത്തും കനത്ത തോൽവി ഏറ്റുവാങ്ങി കൊണ്ടിരിക്കുന്ന കോൺഗ്രസിനെ പരിഹസിച്ച് രംഗത്തെത്തിയിരിക്കുകയാണ് വിദ്യാഭ്യാസമന്ത്രി വി ശിവൻകുട്ടി.
ഫേസ് ബുക്ക് കുറിപ്പിലൂടെയാണ് അദ്ദേഹത്തിന്റെ പരിഹാസം. രാഹുൽ ഗാന്ധിയുടേയും സോണിയാഗാന്ധിയുടേയും പ്രിയങ്ക ഗാന്ധിയുടേയും കാർട്ടൂൺ ചിത്രമടങ്ങിയ ട്രോൾ പങ്ക് വെച്ചു കൊണ്ടാണ് അദ്ദേഹത്തിന്റെ ഫേസ് ബുക്ക് കുറിപ്പ്. ട്രോളിലൂടെ കുടുംബപാർട്ടിയാണ് കോൺഗ്രസെന്ന് അദ്ദേഹം പരിസഹിക്കുന്നു.
തമ്മിലടിയും ചേരിതിരിവും അഴിമതിയും സ്വജനപക്ഷപാതവും കൊണ്ട് അവശേഷിക്കുന്ന കോൺഗ്രസും ജനങ്ങൾക്ക് ബാധ്യതയാവുമെന്ന് അദ്ദേഹം പരിഹസിച്ചു.കോൺഗ്രസ് മത്സരിച്ചത് ഉത്തർപ്രദേശിൽ ഗുണം ചെയ്തത് ബിജെപിക്കാണെന്ന് മന്ത്രി വി ശിവൻകുട്ടി പറഞ്ഞു.മതനിരപേക്ഷ വോട്ടുകൾ ഭിന്നിപ്പിച്ചത് മൂലം കോൺഗ്രസ് മത്സരിച്ചത് ഉത്തർപ്രദേശിൽ ബിജെപിക്കാണ് ഗുണം ചെയ്തത് എന്ന് അദ്ദേഹം വ്യക്തമാക്കി.
ദേശീയ തലത്തിൽ ബിജെപിക്ക് ബദൽ കോൺഗ്രസ് എന്ന് കുറേകാലമായി വലതുപക്ഷ വിശകലന വിദഗ്ധർ പറയുന്നു. എന്നാൽ കോൺഗ്രസ് അടി പതറിയ മറ്റൊരു തെരഞ്ഞെടുപ്പ് വിധി കൂടി വന്നുകൊണ്ടിരിക്കുകയാണെന്ന് അദ്ദേഹം ചൂണ്ടിക്കാട്ടി.
