വാസ്‌കോ: ഇന്ത്യൻ സൂപ്പർ ലീഗിൽ ഫൈനലിലെത്തിയ ബ്ലാസ്റ്റേഴ്‌സിന്റെ പോരാട്ടം നേരിട്ട് കാണാൻ ആരാധകരെ ഗോവയിലേക്ക് ക്ഷണിച്ച് പരിശീലകൻ ഇവാൻ വുക്കൊമനോവിച്ച്. ഞായറാഴ്ച നടക്കുന്ന ഫൈനൽ മത്സരം നേരിട്ട് കാണാനും ടീമിന് പിന്തുണ നൽകാനുമാണ് പരിശീലകൻ ആരാധകരെ ഗോവയിലേക്ക് ക്ഷണിക്കുന്നത്. സിദ്ധിഖ് ലാൽ സംവിധാനം ചെയ്ത ഗോഡ് ഫാദർ സിനിമയിലെ എൻഎൻ പിള്ളയുടെ പ്രശസ്തമായ കേറി വാടാ മക്കളെ എന്ന ഡയലോഗുമായാണ് ഇവാൻ രംഗത്തെത്തിയത്. സിനിമയിലെ ബിജിഎമ്മും ഡയലോഗിന് കൂട്ടായി എത്തുന്നുണ്ട്.
പ്രിയമുള്ളവരേ നമ്മൾ ഐഎസ്എൽ ഫൈനൽ കളിച്ചിട്ട് കുറച്ചു നാളുകളായി.ഞങ്ങൾ നിങ്ങളെ ഗോവയിലേക്ക് സ്വാഗതം ചെയ്യുന്നു. ഇവിടെ വന്ന് ടീമിനു പിന്തുണ നൽകൂ, കേറിവാടാ മക്കളേ എന്നാണ് ഇവാന്റെ ഡയലോഗ്. കേരള ബ്ലാസ്റ്റേഴ്സ് സമൂഹമാദ്ധ്യമങ്ങളിൽ പോസ്റ്റ് ചെയ്ത വീഡിയോയിലാണ് മാസ് ഡയലോഗ്.
ഇതിന് മുൻപ് ജംഷഡ്പുർ എഫ്‌സിക്കെതിരായ രണ്ടാം പാദ സെമി ഫൈനലിനു പിന്നാലെ ആരാധകരെ ഗോവയിലേക്ക് സ്വാഗതം ചെയ്ത ഇവാന്റെ വീഡിയോയും സമൂഹമാദ്ധ്യമങ്ങളിൽ തരംഗമായിരുന്നു. മഞ്ഞപ്പട ,ഞങ്ങൾ നിങ്ങളെ കാത്തിരിക്കുന്നു.ഇവിടെ നിങ്ങൾക്കായി കാത്തിരിക്കുന്നു വരൂ എന്നായിരുന്നു ഡയലോഗ്.
ഇന്ത്യൻ സൂപ്പർ ലീഗിന്റെ ചരിത്രത്തിൽ മൂന്നാം ഫൈനലിനാണ് കേരള ബ്ലാസ്റ്റേഴ്സ് തയ്യാറെടുക്കുന്നത്. 2014,2016 വർഷങ്ങളിലാണ് ടീം ഇതിന് മുൻപ് ഫൈനലിലെത്തിയത്.
Comments