പാകിസ്താന്റെ ഔദ്യോഗിക യൂട്യൂബ് ചാനലിന്റെ പേര് ‘ഇമ്രാൻ ഖാൻ’ ; പേര് മാറ്റൽ പുറത്താകുമെന്ന് ഉറപ്പായപ്പോൾ

ഇസ്ലാമാബാദ് : പാകിസ്താൻ പ്രധാനമന്ത്രി പദവി നഷ്ടമാകുമെന്ന് ഉറപ്പായതോടെ ഔദ്യോഗിക യൂട്യൂബ് ചാനലിന്റെ പേര് ഇമ്രാൻ ഖാൻ. പ്രധാനമന്ത്രിയുടെ ഓഫീസ് എന്ന പേരാണ് മാറ്റിയത്. ‘ഇമ്രാൻ ഖാൻ’ എന്നാണ് ചാനലിന്റെ പുതിയ പേര്.

പാകിസ്താൻ നാഷണൽ അസംബ്ലിയുടെ ആദ്യ ദിവസമാണ് പ്രധാനമന്ത്രിയുടെ ഓഫീസ് എന്ന പേര് മാറ്റിയത്. ഇമ്രാൻ ഖാനെതിരെ പ്രതിപക്ഷം പാർലമെന്റിൽ അവിശ്വാസ പ്രമേയം സമർപ്പിച്ച സാഹചര്യത്തിലാണ് പേരുമാറ്റം. പ്രധാനമന്ത്രിയുടെ ഓഫീസ് എന്ന പേര് മാറ്റിയതിന് ശേഷം വേരിഫൈഡ് ബ്ലൂ ടിക്ക് അപ്രത്യക്ഷമായിരിക്കുകയാണ്. യൂട്യൂബ് നിയമങ്ങൾ അനുസരിച്ച് ഒരു ചാനലിന്റെ പേര് മാറ്റിയാൽ, പരിശോധിച്ച് ഉറപ്പിച്ച ശേഷം മാത്രമേ വീണ്ടും ചാനലിൽ ബ്ലൂ ടിക്ക് പ്രത്യക്ഷപ്പെടൂ.

2019 ലാണ് പാക് സർക്കാർ യൂട്യൂബ് ചാനൽ ആരംഭിച്ചത്. 1,50,000 ത്തോളം ഫോളോവേഴ്‌സ് ഉണ്ട് ചാനലിന്. അതേസമയം യൂട്യൂബ് ചാനൽ തങ്ങളല്ല കൈകാര്യം ചെയ്യുന്നത് എന്നും ഭരണകൂടത്തിന്റെ ട്വിറ്ററും ഫേസ്ബുക്കും മാത്രമേ കൈകാര്യം ചെയ്യുന്നുള്ളൂ എന്നും പാകിസ്താൻ ഡിജിറ്റൽ മീഡിയ വിങ് ജനറൽ മാനേജർ ഇമ്രാൻ ഖസാലി അറിയിച്ചു.