കൈകൊടുത്ത് തോളത്ത് തട്ടി യോഗി; ചിരിച്ച് സ്വീകരിച്ച് അഖിലേഷ്; യുപിയിൽ നിയമസഭ സമ്മേളനം ആരംഭിച്ചു

ലക്‌നൗ: തിരഞ്ഞെടുപ്പ് പോരാട്ടത്തിനും വാദപ്രതിവാദങ്ങൾക്കും ആരോപണ പ്രത്യാരോപണങ്ങൾക്കും ശേഷം രാഷ്‌ട്രീയ സൗഹൃദ ദൃശ്യങ്ങൾക്ക് വേദിയായി ഉത്തർപ്രദേശ് നിയമസഭ. മുഖ്യമന്ത്രി യോഗി ആദിത്യനാഥും പ്രതിപക്ഷ നേതാവ് അഖിലേഷ് യാദവും നിയമസഭയിൽ കണ്ടുമുട്ടുന്ന രംഗമാണ് ശ്രദ്ധനേടുന്നത്. നിയമസഭയിലേക്ക് വരുന്ന മുഖ്യമന്ത്രിയെ സമാജ്‌വാദി പാർട്ടി നേതാവായ അഖിലേഷ് യാദവ് സ്വീകരിക്കുകയായിരുന്നു.

അഖിലേഷ് യാദവിന് കൈകൊടുക്കുകയും തോളിൽ തട്ടുകയും ചെയ്യുന്ന യോഗിയെ വീഡിയോയിൽ കാണാം. പുതുതായി തിരഞ്ഞെടുക്കപ്പെട്ട 403 അംഗങ്ങളുടെ സത്യപ്രതിജ്ഞയ്‌ക്കായാണ് ഇന്ന് നിയമസഭ സമ്മേളിച്ചത്. തുടർച്ചയായി രണ്ടാം തവണയാണ് യോഗി ആദിത്യനാഥ് മുഖ്യമന്ത്രിയാകുന്നത്. യുപിയിൽ 273 സീറ്റുകൾ നേടിയാണ് ബിജെപി അധികാരം നിലനിർത്തിയത്.

111 സീറ്റുകളാണ് സമാജ്‌വാദി പാർട്ടി നേടിയത്. അഖിലേഷ് യാദവിനെ ഏകകണ്‌ഠേനയാണ് നിയമസഭാ കക്ഷി നേതാവായി തെരഞ്ഞെടുക്കുകയായിരുന്നു. പിന്നാലെ പ്രതിപക്ഷത്തെ നയിക്കാൻ അഖിലേഷ് യാദവ് എംപി സ്ഥാനം രാജിവെച്ചിരുന്നു. അഖിലേഷ് യാദവ് കർഹാൽ നിയമസഭാ മണ്ഡലത്തിൽ നിന്നാണ് തിരഞ്ഞെടുക്കപ്പെട്ടത്. ലോക്‌സഭാ സ്പീക്കറായ ഓം ബിർളയ്‌ക്കാണ് അദ്ദേഹം രാജി സമർപ്പിച്ചത്.

#WATCH Uttar Pradesh CM Yogi Adityanath meets Leader of Opposition Akhilesh Yadav in the Legislative Assembly during oath-taking of newly-elected legislators #Lucknow pic.twitter.com/7r6fX7ErjX

— ANI UP/Uttarakhand (@ANINewsUP) March 28, 2022