പാലക്കാട്: ദേശീയ പണിമുടക്കിന്റെ പേരിൽ കെഎസ്ഇബി ജീവനക്കാരെ മർദ്ദിച്ച സംഭവത്തിൽ അഞ്ച് പേർ അറസ്റ്റിൽ. സിപിഎം ലോക്കൽ കമ്മിറ്റി സെക്രട്ടറിമാർ ഉൾപ്പെടെയാണ് അറസ്റ്റിലായത്.
കെഎസ്ഇബി ഓഫീസിൽ അതിക്രമിച്ച് കയറി ജീവനക്കാരെ ആക്രമിച്ചെന്നും ഓഫീസിന് നാശനഷ്ടം ഉണ്ടാക്കിയെന്നുമാണ് കേസ്. ആലത്തൂരിലെ കെഎസ്ഇബി ഓഫീസിലായിരുന്നു സംഭവം.
വാഹനങ്ങളിൽ സംഘടിച്ചെത്തിയ സമരാനുകൂലികൾ പണിമുടക്ക് ദിനത്തിൽ പ്രവർത്തിച്ച കെഎസ്ഇബി ഓഫീസിലേക്ക് ഇരച്ചുകയറി. ജീവനക്കാരെ മർദ്ദിച്ച് ഓഫീസിലെ സാധന സാമഗ്രികൾ നശിപ്പിച്ചു. സമരാനുകൂലികളുടെ ആക്രമണത്തിൽ എട്ടോളം ജീവനക്കാർക്ക് പരിക്കേറ്റിരുന്നു. അസിസ്റ്റന്റ് എഞ്ചിനീയർ ഉൾപ്പടെയുള്ളവർക്കാണ് പരിക്കേറ്റത്. ഇവർ താലൂക്ക് ആശുപത്രിയിൽ ചികിത്സയിലാണ്.
പാടൂർ സിപിഎം ലോക്കൽ സെക്രട്ടറി പി.സി പ്രമോദ്, കാവശ്ശേരി ലോക്കൽ സെക്രട്ടറി രജനീഷ്, സിപിഎം പ്രവർത്തകരായ പ്രസാദ്, രാധാകൃഷ്ണൻ, അനൂപ് എന്നിവരാണ് സംഭവത്തിൽ അറസ്റ്റിലായത്.
Comments