ചെന്നൈ : ഒരു തൊഴിലാളിയുടെ ആത്മസംതൃപ്തിയ്‌ക്ക് തൊഴിലിടങ്ങളില്‍ ഏറെ പ്രാധാന്യമുണ്ട് . അതുകൊണ്ടാണ് പല മൾട്ടിനാഷണൽ കമ്പനികളും തങ്ങളുടെ ജീവനക്കാരെ സന്തോഷിപ്പിക്കാൻ ശ്രമിക്കുന്നത് .
ഇത്തരത്തില്‍ കമ്പനിയോട് ഏറ്റവും കൂറും ആത്മാര്‍ഥയും കാണിച്ച അഞ്ച് ജീവനക്കാരെ ഒരു കോടി രൂപ വില മതിക്കുന്ന ബി.എം.ഡബ്ല്യു ആഡംബര കാറുകള്‍ സമ്മാനമായി നല്‍കി ആദരിച്ചിരിക്കുകയാണ് ചെന്നൈയിലെ കിസ്ഫ്‌ളോ എന്ന ഐ.ടി. കമ്പനി.
പത്താം വാർഷികം ആഘോഷിക്കുന്ന കമ്പനിയുടെ തുടക്കം മുതല്‍ ജോലി ചെയ്ത് വരുന്നവരെയാണ് സ്വപ്‌നതുല്യമായ സമ്മാനം നല്‍കി കമ്പനി ആദരിച്ചത്. വൈസ് പ്രസിഡന്റ് പ്രസന്ന രാജേന്ദ്രന്‍, ചീഫ് പ്രൊഡക്ട് ഓഫീസര്‍ ദിനേഷ് വരദരാജന്‍, പ്രൊഡക്ട് മാനേജ്‌മെന്റ് ഡയറക്ടര്‍ കൗശിക്രം കൃഷ്ണസായി, എന്‍ജിനീയറിങ്ങ് വിഭാഗം ഡയറക്ടര്‍മാരായ വിവേക് മധുരൈ, ആദി രാമനാഥന്‍ എന്നീ അഞ്ച് ജീവനക്കാര്‍ക്കാണ് നീലയും കറുപ്പം നിറങ്ങളിലുള്ള ബി.എം.ഡബ്ല്യു 5 സീരീസ് സമ്മാനിച്ചത്.
ബി.എം.ഡബ്ല്യുവിന്റെ ഫൈവ് സീരീസ് ആഡംബര സെഡാനാണ് ഇവർക്ക് സമ്മാനമായി നല്കിയത്. 80 ലക്ഷം രൂപ മുതല്‍ ഒരു കോടി രൂപ വരെ വിലയുള്ള വാഹനങ്ങളാണ് ഓരോരുത്തര്‍ക്കും സമ്മാനമായി നല്കിയത്. കിസ്ഫ്‌ളോയുടെ സ്ഥാപകനായ സുരേഷ് സംബന്തമാണ്‌ കമ്പനിയുടെ മുതിര്‍ന്ന ജീവനക്കാര്‍ക്ക് സമ്മാനം കൈമാറിയത്.
Comments