ചിറ്റൂരിൽ കൊതുമ്പിന് മുകളിലോ കൊച്ചങ്ങ? വകുപ്പിനെ പറ്റി അറിയില്ലെങ്കിൽ ഇട്ടിട്ട് പോണം; മന്ത്രിയെ പരിഹസിച്ച് സിഐടിയു

തിരുവനന്തപുരം: വൈദ്യുതി മന്ത്രി കെ കൃഷ്ണൻ കുട്ടിയ്‌ക്കെതിരെ രൂക്ഷ വിമർശനവുമായി സിഐടിയു.സമരം ചെയ്യുന്നവരുമായി ചർച്ചയില്ലെന്ന മന്ത്രിയുടെ പരാമർശത്തിന് പിന്നാലെയാണ് വിമർശനം.

വകുപ്പിനെ കുറിച്ച് അറിയാത്ത മന്ത്രി എന്തിന് ആ സ്ഥാനത്ത് ഇരിക്കുന്നു,അറിയില്ലങ്കിൽ ഇട്ടിട്ട് പോകണമെന്ന് സിഐടിയു സംസ്ഥാന സെക്രട്ടറി കെഎസ് സുനിൽകുമാർ പറഞ്ഞു. കെഎസ്ഇബി ഓഫീസേഴ്‌സ് അസോസിയേഷൻ വൈദ്യുത ഭവന് മുന്നിൽ നടത്തുന്ന അനിശ്ചിതകാല റിലേ സത്യാഗ്രഹം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

കാസർകോട് മുതൽ തിരുവനന്തപുരം വരെ യാത്ര ചെയ്യുന്നവരാണ് ഞങ്ങൾ, കേരളത്തിൽ ചിറ്റൂർ ഒഴിച്ച് മറ്റ് എല്ലായിടത്തും കൊതുമ്പിന് കീഴെയാണ് കൊച്ചങ്ങ. എന്നാൽ അവിടെ മാത്രം കൊതുമ്പിന് മുകളിലാണോ കൊച്ചങ്ങ എന്ന് സംശയം ഞങ്ങൾക്കുണ്ട്.വൈദ്യുതി മന്ത്രി കെ കൃഷ്ണൻകുട്ടി വകുപ്പ് ഏറ്റെടുത്ത ശേഷമാണ് ഈ കാഴ്ച കാണുന്നതെന്ന് സുനിൽകുമാർ പരിഹസിച്ചു.

കെഎസ്ഇബി ചെയർമാന് മീഡിയ മാനിയയാണ്. മന്ത്രിയുടെ അനുമതിയോടെയാണോ ചെയർമാൻ മാദ്ധ്യമങ്ങളിൽ തൊഴിലാളി വിരുദ്ധ പരാമർശം നടത്തിയതെന്ന് വ്യക്തമാക്കണം. അല്ലെങ്കിൽ ചെയർമാനെ സസ്പെൻഡ് ചെയ്യാൻ മന്ത്രി തയ്യാറാകണമെന്ന് അദ്ദേഹം ആവശ്യപ്പെട്ടു.

സംഭവം വിവാദമായതിന് പിന്നാലെ മന്ത്രിക്ക് മുകളിലാണോ ചെയർമാൻ എന്ന ആശങ്ക മാത്രമാണ് പങ്കുവെച്ചതെന്ന വിശദീകരണവുമായി സുനിൽകുമാർ തന്നെ നേരിട്ട് രംഗത്തെത്തിയിട്ടുണ്ട്.