തൃശൂർ: വടക്കുംനാഥ ക്ഷേത്രത്തിലെ ഭക്തർക്ക് സുരേഷ് ഗോപി എം.പിയുടെ കൈനീട്ടം വിതരണം ചെയ്യുന്നതിൽ നിന്ന് വിലക്കിയ കൊച്ചിൻ ദേവസ്വം ബോർഡിനെതിരെ പ്രതിഷേധവുമായി തൃശൂരിലെ ബിജെപി പ്രവർത്തകർ. വടക്കുന്നാഥ ക്ഷേത്രത്തിൽ ദർശനത്തിനെത്തിയ ഭക്തർക്ക് സുരേഷ് ഗോപി ഏൽപ്പിച്ച വിഷുകൈനീട്ടം ബിജെപി പ്രവർത്തകർ നൽകി.
സുരേഷ് ഗോപി എം.പി വടക്കുന്നാഥ ക്ഷേത്രത്തിൽ നൽകിയ ദക്ഷിണ വിഷു കൈനീട്ടമായി നൽകുന്നതിൽ നിന്നാണ് മേൽശാന്തിയെ ദേവസ്വം ബോർഡ് പ്രസിഡന്റ് വിലക്കിയത്. ഇതിൽ പ്രതിഷേധിച്ചാണ് സുരേഷ് ഗോപിയുടെ കൈനീട്ടം ബിജെപി പ്രവർത്തകർ നേരിട്ട് വിതരണം ചെയ്തത്. ജില്ലാ പ്രസിഡന്റ് അഡ്വ. കെ. കെ അനീഷ് കുമാറിന്റെ നേതൃത്വത്തിലായിരുന്നു പരിപാടി. കുഞ്ഞുങ്ങൾക്കും മുതിർന്നവർക്കുമുൾപ്പെടെ എംപിയുടെ കൈനീട്ടം ബിജെപി പ്രവർത്തകർ വിതരണം ചെയ്തു.
എല്ലാവരും സന്തോഷത്തോടെയാണ് കൈനീട്ടം സ്വീകരിച്ച് മടങ്ങിയത്. തൃശൂർ ജില്ലയുടെ വിവിധ ഭാഗങ്ങളിൽ കഴിഞ്ഞ ആഴ്ച മുതൽ സുരേഷ് ഗോപി എംപിയുടെ വിഷുകൈനീട്ടം വിതരണം ചെയ്യുന്നുണ്ടായിരുന്നു. എംപി നേരിട്ടെത്തിയ ചടങ്ങുകളിൽ ദിവ്യാംഗരായ കുട്ടികൾക്ക് ഉൾപ്പെടെയാണ് കൈനീട്ടം നൽകിയത്. ഇത് വാർത്തകളിൽ ഇടംപിടിച്ചതോടെ സിപിഎം, സിപിഐ ജില്ലാ നേതൃത്വങ്ങൾ ഇടപെട്ടാണ് കൈനീട്ടം നൽകുന്നത് വിലക്കി കൊച്ചിൻ ദേവസ്വം ബോർഡ് പ്രസിഡന്റിനെക്കൊണ്ട് നോട്ടീസ് പുറപ്പെടുവിച്ചത്.
സ്വകാര്യ വ്യക്തികളിൽ നിന്നും മേൽശാന്തിമാർ കൈനീട്ടം നൽകാൻ പണം സ്വീകരിക്കരുതെന്നും ഇത് രാഷ്‌ട്രീയലാഭത്തിന് ഉപയോഗിക്കുമെന്നും കാട്ടിയായിരുന്നു നോട്ടീസ്. ഇതിനെതിരെ വ്യാപക പ്രതിഷേധമാണ് ബിജെപി ഉയർത്തിയത്. ക്ഷേത്ര പൂജാരിമാർക്ക് ദക്ഷിണ നൽകുന്നതും ആ ദക്ഷിണ വിഷുവിന് പൂജാരിമാർ കൈനീട്ടമായി നൽകുന്നതും ക്ഷേത്രങ്ങളിൽ സർവ്വസാധാരണമാണെന്ന് ബിജെപി ചൂണ്ടിക്കാട്ടുന്നു.
Comments