ഹനുമാൻ ജയന്തി ദിനത്തിലെ ഡൽഹി സംഘർഷത്തെ അപലപിച്ച് രാജ് താക്കറെ; ആയുധം പ്രയോഗിക്കാൻ പ്രേരിപ്പിക്കരുതെന്ന് എംഎൻഎസ് തലവൻ

ഡൽഹിയിലെ ജഹാംഗീർപുരി അക്രമത്തിൽ ഖേദം പ്രകടിപ്പിക്കുകയും ഹനുമാൻ ജയന്തി റാലിക്ക് നേരെ കല്ലെറിയുന്നവർക്ക് തക്കതായ മറുപടി നൽകുമെന്നും മഹാരാഷ്‌ട്ര നവനിർമാൺ സേന (എംഎൻഎസ്) തലവൻ രാജ് താക്കറെ. ശനിയാഴ്‌ച്ച ഹനുമാൻ ജയന്തി ഘോഷയാത്രയ്‌ക്കിടെ രണ്ട് സമുദായങ്ങൾ തമ്മിൽ വൈകുന്നേരം 5.30 ഓടെയാണ് സംഘർഷമുണ്ടായത്. ആയുധങ്ങൾ കയ്യിൽ പിടിക്കാൻ ഞങ്ങളെ നിർബന്ധിക്കരുത് എന്ന് എംഎൻഎസ് മേധാവി രാജ് താക്കറെ മുന്നറിയിപ്പ് നൽകി.

‘അവർ കല്ലെറിഞ്ഞാൽ തങ്ങൾ മിണ്ടാതിരിക്കില്ല, അവർക്ക് എങ്ങനെ ഉത്തരം നൽകണമെന്ന് ഞങ്ങൾക്കറിയാം, തങ്ങളും കയ്യിൽ കല്ല് എടുക്കാൻ തയ്യാറാകും എംഎൻഎസ് മേധാവി വ്യക്തമാക്കി. അതിനിടെ എംഎൻഎസ് പ്രസിഡന്റ് രാജ് താക്കറെ തന്റെ പത്രസമ്മേളനത്തിൽ രണ്ട് പ്രധാന പ്രഖ്യാപനങ്ങൾ നടത്തി. മെയ് ഒന്നിന് മഹാരാഷ്‌ട്ര ദിനത്തോടനുബന്ധിച്ച് അദ്ദേഹം സംഭാജിനഗറിൽ പൊതുയോഗത്തെ അഭിസംബോധന ചെയ്യുമെന്നായിരുന്നു ആദ്യ അറിയിപ്പ്. ജൂൺ 5ന് അദ്ദേഹം തന്റെ അനുയായികൾക്കൊപ്പം ഉത്തർപ്രദേശിലെ അയോധ്യ സന്ദർശിച്ച് രാംലല്ലയെ ദർശിക്കും.

നേരത്തെ, മുംബൈയിലെ ശിവാജി പാർക്കിൽ നടന്ന പൊതുറാലിയിൽ സംസാരിച്ച മഹാരാഷ്‌ട്ര നവനിർമ്മാൺ സേന തലവൻ പള്ളികളിൽ നിന്ന് ഉച്ചഭാഷിണികൾ നീക്കം ചെയ്യണമെന്ന് ആവശ്യപ്പെടുകയും, ഈ വിഷയത്തിൽ വിളിച്ചാൽ പള്ളിക്ക് പുറത്തുള്ള സ്പീക്കറുകൾ ഹനുമാൻ ചാലിസ കൂടുതൽ ശബ്ദത്തിൽ വായിക്കുമെന്ന് ഭീഷണിപ്പെടുത്തുകയും ചെയ്തിരുന്നു.

ഡൽഹിയിലെ ജഹാംഗീർപുരി മേഖലയിൽ അക്രമവുമായി ബന്ധപ്പെട്ട് 14 പേർ അറസ്റ്റിലായി. ഏപ്രിൽ 16ലെ ഐപിസി സെക്ഷൻ 147, 148, 149, 186, 353, 332, 323, 427, 436, 307, 120 ബി, ആയുധ നിയമത്തിലെ 27 എന്നിവ പ്രകാരം എഫ്ഐആർ രജിസ്റ്റർ ചെയ്തിട്ടുണ്ട്. രണ്ട് സമുദായങ്ങൾ തമ്മിലുള്ള സംഘർഷത്തിൽ ഒമ്പത് പേരെ അറസ്റ്റ് ചെയ്യുകയും ഒമ്പത് പേർക്ക് പരിക്കേൽക്കുകയും ചെയ്തതായി ഡൽഹി പോലീസ് ഡെപ്യൂട്ടി കമ്മീഷണർ ഉഷാ രംഗ്നാനി പറഞ്ഞു.

ജഹാംഗീർപുരിയിൽ സ്ഥിതിഗതികൾ നിയന്ത്രണവിധേയമാക്കാൻ 40-50 റൗണ്ട് കണ്ണീർ വാതകം പ്രയോഗിച്ചതായി എഫ്ഐആർ പറയുന്നു. സബ് ഇൻസ്പെക്ടർ എം എൽ മീണയുടെ ഇടതുകൈയിൽ വെടിയേറ്റതായും എഫ്ഐആറിൽ പറയുന്നു. സംഘർഷത്തെ തുടർന്ന് കനത്ത പോലീസ് വിന്യാസത്തോടെ പ്രദേശത്ത് കനത്ത സുരക്ഷയാണ് ഏർപ്പെടുത്തിയിരിക്കുന്നത്.