കൊച്ചി : ദിലീപിന്റെ സഹോദരീ ഭർത്താവ് ടി എൻ സുരാജിനെക്കുറിച്ചുള്ള മാദ്ധ്യമ വാർത്തകൾക്ക് വിലക്ക്. മൂന്നാഴ്ചത്തേക്കാണ് ഹൈക്കോടതി വിലക്കേർപ്പെടുത്തിയത്. മാദ്ധ്യമ വാർത്തകൾ അപകീർത്തിപ്പെടുത്തുന്നുവെന്ന സുരാജിന്റെ ഹർജി പരിഗണിച്ചുകൊണ്ടാണ് കോടതി ഉത്തരവിട്ടത്.
കുടുംബാംഗങ്ങളുമായി നടത്തുന്ന സംഭാഷണങ്ങൾ വരെ മാദ്ധ്യമങ്ങൾ പുറത്തുവിടുന്നുവെന്നാണ് ഹർജിയിൽ സുരാജ് പറഞ്ഞത്. ഇത് മാദ്ധ്യമ വിചാരണയാണെന്നും ആരോപിച്ചിരുന്നു. കേസുമായി ബന്ധപ്പെട്ട് സുരാജിന്റേത് ഉൾപ്പെടെയുള്ള സംഭാഷണങ്ങൾ കഴിഞ്ഞ ദിവസം പുറത്ത് വന്നിരുന്നു. ഇവരുടെ ഫോണുകൾ ഫോറൻസിക് സംഘം പരിശോധിക്കുകയും ഓഡിയോ ക്ലിപ്പുകൾ റിക്കവർ ചെയ്യുകയും ചെയ്തിരുന്നു. ഇതിൽ നിന്ന് കേസിലെ വിവരങ്ങളും പുറത്ത് വന്നു.
എന്നാൽ ഇത്തരം ക്ലിപ്പുകൾ ഉപയോഗിച്ച് മാദ്ധ്യമങ്ങൾ തന്നെ അപകീർത്തിപ്പെടുത്താൻ ശ്രമിക്കുകയാണെന്നാണ് സുരാജിന്റെ ആരോപണം. അന്വേഷണ ഉദ്യോഗസ്ഥർ വിവരങ്ങൾ മാദ്ധ്യമങ്ങൾക്ക് ചോർത്തി നൽകുന്നുണ്ടെന്നും ഇത് തടയണമെന്നും സുരാജ് കോടതിയിൽ ആവശ്യപ്പെട്ടു. തുടർന്നാണ് മൂന്നാഴ്ചത്തേക്ക് കോടതി വിലക്കേർപ്പെടുത്തിയത്. ഈ സമയപരിധിക്ക് ശേഷം കോടതി കേസ് വീണ്ടും പരിഗണിക്കും.
