5,000 രൂപയ്‌ക്ക് മുകളിൽ വിലയുള്ള സമ്മാനം ലഭിച്ചാൽ സർക്കാർ ഖജനാവിലേയ്‌ക്ക് : മന്ത്രിമാർക്ക് കർശന പെരുമാറ്റച്ചട്ടവുമായി യോഗി ആദിത്യനാഥ്

ലക്നൗ : മന്ത്രിമാർക്ക് 5,000 രൂപയ്‌ക്ക് മുകളിൽ മതിപ്പുള്ള സമ്മാനം ലഭിച്ചാൽ അത് സർക്കാർ ഖജനാവിൽ നിക്ഷേപിക്കണമെന്ന കർശന പെരുമാറ്റച്ചട്ടം ഇറക്കി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്.

‘ എന്ത് ചെയ്യണം, എന്തുചെയ്യരുത് ‘ എന്ന കർശന നിയമങ്ങളാണ് യോഗി സർക്കാർ പുറത്തിറക്കിയ പെരുമാറ്റച്ചട്ടത്തിൽ ഉള്ളത്. മുഖ്യമന്ത്രി യോഗി ആദിത്യനാഥിന്റെ ഈ ഉദ്യമത്തിനു പൊതുജനങ്ങളിൽ നിന്നടക്കം അനുകൂല പ്രതികരണങ്ങളാണ് ലഭിക്കുന്നത് . മന്ത്രിമാർക്കായി പുറപ്പെടുവിച്ച മാർഗനിർദേശങ്ങൾ കർശനമായി പാലിക്കുന്നുണ്ടെന്ന് പരിശോധിക്കാനായി പ്രത്യേക സംഘത്തെയും തയ്യാറാക്കിയിട്ടുണ്ട്.

ഏതാനും ദിവസങ്ങൾക്ക് മുമ്പ് യോഗി ആദിത്യനാഥ്, ജനപ്രതിനിധികൾ, ഐഎഎസ്, ഐപിഎസ് ഉദ്യോഗസ്ഥർ ഉൾപ്പെടെ തന്റെ എല്ലാ മന്ത്രിമാരോടും അടക്കം സ്വത്ത് വെളിപ്പെടുത്താൻ ഉത്തരവിട്ടിരുന്നു. ഇതുകൂടാതെ, ഇവരുടെ എല്ലാവരുടെയും ബന്ധുക്കളോടും സ്വത്തുക്കൾ വെളിപ്പെടുത്താൻ ആവശ്യപ്പെട്ടു.

അവയെല്ലാം പൊതുജനങ്ങൾക്ക് ഓൺലൈനായി അറിയുന്നതിനുള്ള ക്രമീകരണങ്ങൾ ചെയ്യുന്നതിനുള്ള മാർഗ്ഗനിർദ്ദേശങ്ങളും പുറപ്പെടുവിച്ചിട്ടുണ്ട്. ഈ ഉത്തരവിന് ശേഷമാണ്, യോഗി ആദിത്യനാഥ് സർക്കാർ മന്ത്രിമാർക്ക് പെരുമാറ്റച്ചട്ടം നടപ്പാക്കാനുള്ള ഒരുക്കങ്ങൾ ആരംഭിച്ചത് .

ഒരു മന്ത്രിക്ക് അയ്യായിരം രൂപയിൽ കൂടുതൽ വിലയുള്ള സമ്മാനം ലഭിക്കുന്നുണ്ടെങ്കിൽ നിരസിക്കാനുളള അവകാശവും പെരുമാറ്റച്ചട്ടത്തിൽ ഉൾപ്പെടുത്തിയിട്ടുണ്ടെന്നാണ് വിവരം . ജനപ്രാതിനിധ്യ നിയമപ്രകാരം എല്ലാ എംഎൽഎമാർക്കും മന്ത്രിമാർക്കും ഈ മാനദണ്ഡങ്ങൾ നിശ്ചയിച്ചിട്ടുണ്ട്. ഇത്തരമൊരു പെരുമാറ്റച്ചട്ടം കേന്ദ്രസർക്കാർ നേരത്തെ പുറപ്പെടുവിച്ചിട്ടുണ്ടെങ്കിലും യഥാർത്ഥത്തിൽ അത് നടപ്പാക്കിയിട്ടില്ലെന്നാണ് ഉത്തർപ്രദേശ് സർക്കാരിലെ മുതിർന്ന മന്ത്രിമാർ പറയുന്നത്. പെരുമാറ്റച്ചട്ടം അനുസരിച്ച് വിദേശത്ത് നിന്നടക്കം 5000 രൂപയിൽ കൂടുതൽ സമ്മാനം നൽകിയാൽ അത് സംസ്ഥാനത്തിന്റെ സ്വത്തായി കണക്കാക്കി ഖജനാവിൽ നിക്ഷേപിക്കണമെന്നും പറയുന്നു.

പെരുമാറ്റച്ചട്ടം അനുസരിച്ച്, മന്ത്രിമാരും അവരുടെ കുടുംബവുമായി ബന്ധപ്പെട്ട എല്ലാ ആളുകളും വിലയേറിയ സമ്മാനങ്ങൾ വാങ്ങരുതെന്നും സർക്കാർ വൃത്തങ്ങൾ പറയുന്നു. ഈ പെരുമാറ്റച്ചട്ടം തത്വത്തിൽ പാലിക്കാൻ ഇത്തവണ മറ്റുചില ക്രമീകരണങ്ങളും ഏർപ്പെടുത്തിയിട്ടുണ്ടെന്നും ഉദ്യോഗസ്ഥർ പറയുന്നു. ആ ക്രമീകരണങ്ങൾ എന്താണെന്ന് വെളിപ്പെടുത്തിയിട്ടില്ലെങ്കിലും, അത് അത്ര പെട്ടെന്ന് ആർക്കും ലംഘിക്കാൻ കഴിയില്ലെന്നും ഉദ്യോഗസ്ഥർ പറയുന്നു.