കോട്ടയം: സ്വാതന്ത്ര്യസമര സേനാനിയും വിപ്ലവകാരിയുമായ വീര വിനായക ദാമോദര സവർക്കർ ചങ്ങനാശ്ശേരി സന്ദർശിച്ചതിന്റെ എൺപത്തിരണ്ടാം വാർഷികാഘോഷം പെരുന്നയിൽ .മെയ് നാലിന് ശിവഗംഗ ഓഡിറ്റോറിയത്തിൽ വച്ചാണ് സവർക്കറുടെ സന്ദർശനത്തിന്റെ വാർഷികം ആഘോഷിക്കുന്നത്. സ്മൃതി ചാരിറ്റബിൾ ട്രസ്റ്റാണ് വാർഷികാഘോഷം സംഘടിപ്പിക്കുന്നത്.
1940 മെയ് നാലിനാണ് എൻ.എസ്.എസ് രജത ജൂബിലി ആഘോഷത്തിൽ സവർക്കർ പങ്കെടുത്തത്. മന്നത്ത് പദ്മനാഭന്റെ ക്ഷണം സ്വീകരിച്ചായിരുന്നു സവർക്കർ ചങ്ങനാശ്ശേരിയിൽ എത്തിയത്. ചെങ്കോട്ട മുതൽ സ്വീകരണം നൽകിയാണ് സവർക്കറെ സമ്മേളനത്തിലേക്ക് ആനയിച്ചതെന്ന് മന്നത്ത് പദ്മനാഭൻ തന്റെ ആത്മകഥയിൽ വ്യക്തമാക്കിയിട്ടുണ്ട്. ചങ്ങനാശ്ശേരിയുടെ ചരിത്രത്തിലെ സുവർണ നിമിഷത്തെ ഓർമ്മപ്പെടുത്താനാണ് പരിപാടി സംഘടിപ്പിക്കുന്നതെന്ന് സ്മൃതി ചാരിറ്റബിൾ ട്രസ്റ്റ് പ്രവർത്തകർ വ്യക്തമാക്കി.
മെയ് നാലിന് വൈകിട്ട് അഞ്ചരയ്‌ക്ക് നടക്കുന്ന പരിപാടിയിൽ പ്രൊഫസർ എൻ. ജഗദീഷ് അദ്ധ്യക്ഷത വഹിക്കും. വിഎൻ ഗോപിനാഥ് ആമുഖ പ്രഭാഷണവും വാഴൂർ ആശ്രമം മഠാധിപതി ഗരുഡദ്ധ്വജാനന്ദ തീർത്ഥപാദ സ്വാമികൾ അനുഗ്രഹ പ്രഭാഷണവും നടത്തും. പ്രമുഖ എഴുത്തുകാരൻ രാജീവ് ഇരിങ്ങാലക്കുട മുഖ്യപ്രഭാഷണം നടത്തും.
Comments