ഇഷ്ടപ്പെട്ടയാളെ വിവാഹം കഴിക്കുന്നത് ഇന്ന് പുതുമയുള്ള കാര്യമല്ല.മനുഷ്യൻമാർ തമ്മിൽ നടന്നിരുന്ന വിവാഹങ്ങൾ ഇപ്പോൾ മനുഷ്യനും വസ്തുക്കളും എന്തിനേറെ പറയുന്നു ഇഷ്ടപ്പെട്ട നിറത്തിനെ വരെ കല്യാണം കഴിച്ചവരുണ്ട്. ഏറ്റവും ഒടുവിലിതാ സ്വന്തം വളർത്തു മൃഗമായ പൂച്ചയെ വിവാഹം ചെയ്ത യുകെയിലെ ഒരു യുവതിയുടെ കഥയാണ് ഇപ്പോൾ സമൂഹമാദ്ധ്യമങ്ങളിലെ പ്രധാന ചർച്ചാ വിഷയം.
ഇത്രയേറെ മനുഷ്യരുണ്ടായിട്ടും ഇവരെന്തിനാണ് സ്വന്തം വളർത്തു മൃഗത്തെ വിവാഹം ചെയ്തതെന്ന് ചോദിക്കുന്നവരോട് സ്നേഹത്തിന് കണ്ണില്ല,മൂക്കില്ല എന്ന ക്ലീഷേ മറുപടിയല്ല യുവതിയ്ക്ക് പറയാൻ ഉള്ളത്.ആലോചിച്ച് തല പുണ്ണാക്കേണ്ട. തന്റെ പൂച്ചയെ വീട്ടിൽ വളർത്തുന്നത് സംബന്ധിച്ച് ഭൂവുടമസ്ഥനുംയുവതിയും തർക്കമുണ്ടായി. പൂച്ചയെ ഉപേക്ഷിക്കാൻ പറഞ്ഞു.ഇതാണ് യുവതി പൂച്ചയെ തന്നെ വിവാഹം ചെയ്യാൻ തീരുമാനിച്ചതിന് കാരണമായത്.
40 കാരിയായ ഡെബോറ ഹോഡ്ജാണ് യുകെയിലെ ഒരു പാർക്കിൽ വെച്ച് തന്റെ വിവാഹം പൂച്ചയുമായി കഴിഞ്ഞതായി പ്രഖ്യാപിച്ചത്. സാധാരണ വിവാഹം പോലെ തന്നെ ഇരുവരും വിവാഹ വസ്ത്രങ്ങൾ അണിഞ്ഞാണ് ചടങ്ങിനെത്തിയത്. കഴിഞ്ഞ വർഷങ്ങളിൽ ഭൂവുടമസ്ഥന്റെ വാശി കാരണം നിരവധി വളർത്തു മൃഗങ്ങളെ തനിക്ക് ഉപേക്ഷി വന്നെന്നും ഈ പൂച്ചയെ വേർപിരിയാനാകാത്തതു കൊണ്ടാണ് വിവാഹം ചെയ്തതെന്നും യുവതി പറയുന്നു.
ഇന്ത്യയെന്നാണ് പൂച്ചയ്ക്ക് യുവതി നൽകിയിരിക്കുന്ന പേര്. തനിക്ക് ഇന്ത്യയെ പിരിഞ്ഞിരിക്കുന്ന കാര്യത്തെക്കുറിച്ച് ആലോചിക്കാൻ കൂടി സാധിക്കില്ലെന്നാണ് യുവതി പറയുന്നത്. വിവാഹം കഴിച്ചതിലൂടെ തങ്ങളെ ഒരു മനുഷ്യനും പരസ്പരം വേർപിരിക്കാനാവില്ലെന്ന് വിശ്വാസമുണ്ടെന്നും ദൈവ നാമത്തിൽ പ്രതിജ്ഞ എടുത്തതായും യുവതി പറയുന്നു.
എന്തായാലും യുവതിയുടെ ഈ തീരുമാനത്തെ അനുകൂലിച്ചും പ്രതികൂലിച്ചും നിരവധി പേർ എത്തിയിട്ടുണ്ട്. പൂച്ചയെ ഉപേക്ഷിക്കാതിരിക്കാൻ നിയമപരമായ വഴികൾ തേടാമായിരുന്നുവെന്നും ഇതൽപ്പം കടന്ന കയ്യായിപ്പോയെന്നാണുമാണ് പലരും ഉപദേശിക്കുന്നത്. വെബ് ഡസ്ക് ജനം ടിവി ഡോട് കോം.
