ന്യൂഡൽഹി: പ്രധാനമന്ത്രി നരേന്ദ്രമോദിയുടെ ത്രിദിന യൂറോപ്പ് സന്ദർശനം തുടരുന്നു. രണ്ടാം ദിനമായ ഇന്ന് പ്രധാനമന്ത്രി ഡെൻമാർക്കിലെ കോപ്പൻ ഹേഗനിലെത്തി. ഡാനിഷ് പ്രധാനമന്ത്രി മെറ്റെ ഫ്രെഡറിക്സൺ അദ്ദേഹത്തെ വിമാനത്താവളത്തിലെത്തി സ്വീകരിച്ചു. ജർമ്മനിയിലേതിന് സമാനമായി കോപ്പൻ ഹേഗനിലും പ്രധാനമന്ത്രിയ്ക്ക് ഉജ്ജ്വല സ്വീകരണമാണ് ലഭിച്ചത്. ഇന്നലെയാണ് പ്രധാനമന്ത്രിയുടെ യൂറോപ് പര്യടനം ആരംഭിച്ചത്.
നാസിക് ഡോലിന്റെ അകമ്പടിയോടെയാണ് പ്രധാനമന്ത്രിയെ ഡാനിഷ് അധികൃതർ സ്വീകരിച്ചത് . സ്ത്രീകളും പുരുഷന്മാരുമടങ്ങുന്ന നാസിക് ഡോൽ സംഘത്തെ പ്രധാനമന്ത്രി അഭിവാദ്യം ചെയ്തു. ഇവിടെ നിന്നുള്ള പ്രധാനമന്ത്രിയുടെ വീഡിയോ പുറത്തുവിട്ടിട്ടുണ്ട്. ഗൗരവത്തോടെ ഡാനിഷ് നേതാക്കളോട് സംസാരിക്കുന്നതും ഇടയിൽ നാസിക് ഡോൽ ആസ്വദിക്കുന്നതും വീഡിയോയിൽ കാണാം.
മൂന്ന് ദിവസം നീണ്ടു നിക്കുന്നതാണ് പ്രധാനമന്ത്രിയുടെ യൂറോപ് സന്ദർശനം. രണ്ടാം ഇന്ത്യ-നോർഡിക് ഉച്ചകോടിയിൽ പങ്കെടുക്കുന്ന അദ്ദേഹം കൂടുതൽ നിക്ഷേപം ഇന്ത്യയിലേക്ക് എത്തിയ്ക്കാനുള്ള ചർച്ചകൾ നടത്തും. കൊറോണാനന്തര സാമ്പത്തിക മുന്നേറ്റം, കാലാവസ്ഥാ വ്യതിയാനം, ഹരിതോർജ്ജം എന്നിവയാണ് നോർഡിക് ഉച്ചകോടിയിലെ വിഷയങ്ങൾ. ഡാനിഷ് രാജ്ഞി മാർഗരേറ്റുമായും പ്രധാനമന്ത്രി കൂടിക്കാഴ്ച്ച നിശ്ചയിച്ചിട്ടുണ്ട്.
Comments