തിരുവനന്തപുരം: കെഎസ്ആർടിസി പ്രതികാര നടപടിയിലേക്ക്. പണിമുടക്കിൽ പങ്കെടുത്ത ജീവനക്കാർക്കെതിരെ നടപടി സ്വീകരിക്കും. സർക്കാരിന്റെ അഡീഷണൽ സെക്രട്ടറിയാണ് ഇത് സംബന്ധിച്ച ഉത്തരവ് പുറപ്പെടുവിച്ചത്.
പണിമുടക്കിയ ജീവനക്കാരുടെ കൃത്യമായ വിവരങ്ങൾ ഹയർ ഡിവിഷൻ ഓഫീസർമാർ സമർപ്പിക്കണമെന്നാണ് നിർദേശം. പണിമുടക്കിൽ പങ്കെടുത്തവർക്ക് അനുകൂല നടപടി സ്വീകരിക്കുന്ന ഹയർ ഡിവിഷൻ ഓഫീസർമാർക്കെതിരെ കർശന നടപടിയെടുക്കുന്നതാണെന്നും അഡീഷണൽ സെക്രട്ടറിയുടെ ഉത്തരവിൽ പറയുന്നു. റിസർവേഷൻ ഉണ്ടായിരുന്ന സർവീസുകൾ കാൻസൽ ചെയ്യേണ്ടി വന്നിട്ടുണ്ടെങ്കിൽ കാരണക്കാരായ ജീവനക്കാരുടെ പേരുവിവരങ്ങൾ നൽകണമെന്നും ഉത്തരവിൽ പ്രത്യേകം പരാമർശിക്കുന്നുണ്ട്.
ശമ്പള പ്രതിസന്ധിയിൽ പ്രതിഷേധിച്ചായിരുന്നു പ്രതിപക്ഷ യൂണിയനുകൾ 24 മണിക്കൂർ പണിമുടക്കിന് ആഹ്വാനം ചെയ്തത്. സമരത്തെ നേരിടാൻ ഡയ്‌സനോൺ പ്രഖ്യാപിച്ചിരുന്നെങ്കിലും സംസ്ഥാന വ്യാപകമായി സർവീസുകൾ മുടങ്ങിയിരുന്നു. സ്ഥിര ജീവനക്കാരിൽ വളരെ കുറച്ച് പേർ മാത്രമായിരുന്നു പണിമുടക്ക് ദിവസം ജോലിക്കെത്തിയത്.
Comments