മാസ്ക്, ലോകത്ത് കൊറോണ മഹാമാരി പിടിമുറുക്കിയതോടെ നമ്മുടെ നിത്യ ജീവിതത്തിന്റെ ഭാഗമായി മാറിയ ഒന്നാണ് ഫേയ്സ് മാസ്ക്. മുൻപ് ഡോക്ടർമാരും മറ്റും ഉപയോഗിച്ചിരുന്ന മാസ്ക് പിന്നീട് നമ്മുടെ സന്തത സഹചാരിയായി മാറി നിത്യോപയോഗ സാധനമായി മാറിയതോടെ മാസ്കിലും പുത്തൽ ഡിസൈനുകളും ട്രെൻഡുകളും ഉണ്ടാവാൻ തുടങ്ങി. മാർക്കറ്റിൽ ഏറ്റവും കൂടുതൽ വിറ്റു പോകുന്ന വസ്തുക്കളുടെ പട്ടികയിൽ മുൻപന്തിയയിൽ തന്നെയാണ് മാസ്കുകളുടെ സ്ഥാനം . കമ്പനികൾ പല തരത്തിലുള്ള വ്യത്യസ്തമായ മാസ്കുകൾ പുറത്തിറക്കി വിപണി കയ്യടക്കാൻ മത്സരിച്ചു കൊണ്ടിരിക്കുന്നതും നാം കാണുന്നതാണ്. മാസ്ക് അഴിക്കാമെന്നും ഇനിയെങ്കിലും ഒന്ന് ശ്വാസം വിടാമെന്നും കരുതിയിരിക്കെ ആണ് ഇരട്ടി ശക്തിയിൽ വൈറസ് കരുത്താർജ്ജിച്ചതും രോഗം പടരുന്നതും.
എന്തൊക്കെ സ്റ്റൈലിൽ മാസ്ക് ഇറക്കിയാലും മാസ്ക് അധികനേരം മുഖത്ത് വെച്ചാൽ നമുക്ക് ഇറിറ്റേഷൻ തോന്നാറുണ്ടല്ലേ? അപ്പോൾ ചിലർ എന്തു ചെയ്യും മാസ്ക് അല്പസമയം താഴ്ത്തി വെയ്ക്കും. ചിലർ പാടെ ഉപേക്ഷിക്കും. തികച്ചും അപകടകരം എന്ന് അറിയാമെങ്കിലും വേറ വഴിയില്ല എന്നാണ് ആളുകൾ പറയുന്നത്.
ബെൽജിയം കലാകാരും സാമൂഹ്യപ്രവർത്തകനുമായ അലൈൻ വെർഷ്യൂറനും മാസ്ക് അധിക സമയം ഇടുമ്പോൾ നമ്മളെപോലെ തന്നെ നല്ല ഇറിറ്റേഷൻ തോന്നാറുണ്ട്. എല്ലാവരേയും പോലെ മാസ്ക് മൂക്കിന് താഴെ ആക്കി വെക്കുക, മാസ്ക് ഇടാതിരിക്കുക തുടങ്ങിയ രീതികളെല്ലാം പരീക്ഷച്ച് മടുത്ത അദ്ദേഹം അവസാനം അതിനൊരു സൊലൂഷ്യൻ കണ്ടെത്തി. അതെന്താണന്നല്ലേ.. പറയാം. അലൈൻ ഒരു കലാകാരൻ മാത്രമല്ല ഒരു പ്രകൃതി സ്നേഹിയും സാമൂഹ്യപ്രവർത്തകനും ഒക്കെയാണെന്ന് പറഞ്ഞല്ലോ ? അപ്പോൾ അദ്ദേഹം കണ്ടെത്തിയ ഐഡിയയും പ്രകൃതിയോട് ഇണങ്ങിയതാണെന്ന് നമുക്ക് ഊഹിക്കാം. പോർട്ടബിൾ ഒയാസിസ് അഥവാ മരുപ്പച്ച പ്രതിരോധ കവചം എന്ന് പേരിട്ട ഒരു ഫേയ്സ് മാസ്ക് ആണ് അദ്ദേഹം തയ്യാറാക്കിയത്.
എന്താണ് ഇതിന്റെ പ്രത്യേകത എന്നല്ലേ? ഇത് ഒരു മിനി ഹരിത ഹൃഹമാണ്. അതെ അത് തന്നെ. പച്ചപ്പും ഹരിതാഭയും. അലൈൻ അദ്ദേഹത്തിന്റെ പോർട്ടബിൾ ഒയാസിസ് ധരിക്കുമ്പോൾ അദ്ദേഹത്തിന്റെ തലയ്ക്ക് ചുറ്റും സുഗന്ധമുള്ള സസ്യങ്ങൾ നിറഞ്ഞിരിക്കും. എങ്ങനെയാണന്നല്ലേ മാസ്ക് ധരിച്ച് വായയും മൂക്കും മാത്രം സംരക്ഷിക്കുകയല്ല. തല മൊത്തം ഒരു ഗ്ലാസ് വെച്ച് പൊതിഞ്ഞാണ് അയാൾ നടക്കുന്നത്. പ്രത്യേകമായി രൂപകൽപന ഗ്ലാസ് കൂടിനുള്ളിൽ യഥാർത്ഥ മണ്ണും ചെടികളും നിറച്ചാണ് മാസ്ക് നിർമിച്ചിരിക്കുന്നത്.കാശിത്തുമ്പ,റോസ്മേരി,ലാവെൻഡർ തുടങ്ങിയ സസ്യങ്ങളാണ് ഇതിലുള്ളത്.
15 വർഷം മുൻപ് തന്നെ അലൈന്റെ മനസിൽ ഈ ചിന്ത ഉണ്ടായിരുന്നെങ്കിലും കൊറോണയാണ് അദ്ദേഹത്തിന്റെ ഈ ആശയം പ്രബല്യത്തിൽ വരുത്താൻ അവസരമൊരുക്കിയത്. ഇപ്പോഴിത് മാസ്കിനേക്കാൾ സൗകര്യപ്രദമായെന്നും തടസ്സങ്ങളില്ലാതെ ശ്വസിക്കാൻ സാധിക്കുന്നുണ്ടെന്നും അലൈൻ പറയുന്നു. പരിസ്ഥിതിയെ നല്ലതുപോലെ പരിപാലിക്കാനും അന്തരീക്ഷ മലിനീകരണത്തിൽ നിന്ന് സ്വയം രക്ഷ നേടാനും മറ്റുള്ളവർക്ക് താൻ പ്രചോദനമാകുന്നുവെങ്കിൽ നല്ലതല്ലേ എന്നും അദ്ദേഹം ചോദിക്കുന്നു.
ഈ പോർട്ടബിൾ ഓയാസിസും കൊണ്ട് അദ്ദേഹം തെരുവുകൾ തോറും നടന്നു യാത്ര ചെയ്തു. കൗതുകം തോന്നിയ പലരും അദ്ദേഹത്തോട് കാര്യമന്വേഷിച്ചു. ചോദിച്ചവർക്കെല്ലാം അദ്ദേഹം തന്റെ ആശയം പറഞ്ഞു കൊടുത്തു. അങ്ങനെ അദ്ദേഹത്തിന്റെ പാത പിന്തുടർന്ന് ബെൽജിയത്തിലെ നിരവധി പേർ ഇത്തരം പോർട്ടബിൾ ഒയാസിസ് നിർമ്മിച്ച് ധരിക്കാൻ തുടങ്ങി. പക്ഷേ ഭാരക്കൂടുതലും മെയിന്റെയിൻസും ഈ പോർട്ടബിൾ ഒയാസിസിനെ പിന്നോട്ട് വലിക്കുന്നു.
