തൃശൂർ: കനത്തമഴയിൽ തകർന്ന ഇല്ലിക്കൽ റഗുലേറ്റർ ബണ്ട് റോഡിന്റെ അടിയന്തിര നവീകരണം എത്രയും വേഗം പൂർത്തിയാക്കുമെന്ന് ഉന്നതവിദ്യാഭ്യാസ മന്ത്രി ഡോ.ആർ ബിന്ദു. ഇല്ലിക്കൽ ഡാമിന്റെ തെക്കുവശത്തുള്ള ഇറിഗേഷൻ ബണ്ട് റോഡ് മഴയിൽ തകർന്നതിന് പിന്നാലെ സ്ഥലം സന്ദർശിക്കവെയാണ് മന്ത്രി ഇക്കാര്യം വ്യക്തമാക്കിയത്.
റോഡിന്റെ അടിയന്തിര അറ്റകുറ്റപ്പണികൾക്ക് 17 ലക്ഷം രൂപയും മന്ത്രി അനുവദിച്ചു. പ്രവൃത്തിക്ക് ഭരണാനുമതി ലഭിച്ചതായും മന്ത്രി അറിയിച്ചു.
കഴിഞ്ഞ ദിവസമാണ് ബണ്ട് റോഡ് കരുവന്നൂർ പുഴയിലേക്ക് ഇടിഞ്ഞുതാഴ്ന്നത്. പ്രളയകാലത്ത് ഇടിഞ്ഞ ഭാഗം മണൽച്ചാക്കുകൾ കൊണ്ട് തൽക്കാലം കെട്ടിയിരുന്നു. ഈ ഭാഗമാണ് വീണ്ടും ഇടിഞ്ഞത്. വാഹനഗതാഗതത്തെ ഇത് ബാധിച്ചിരുന്നു. തുടർന്ന് എത്രയും വേഗം പ്രശ്നത്തിൽ അടിയന്തിര നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു. ഇതിന് പിന്നാലെയാണ് ബണ്ട് റോഡ് അരികുകെട്ടി പുനർനിർമ്മിക്കാൻ തീരുമാനമായത്.
Comments