സൈക്കിളിൽ നിന്ന് കെട്ടിമറിഞ്ഞ് വീണ് ബൈഡൻ; ‘ എനിക്ക് ഒന്നും പറ്റിയിട്ടില്ലെന്ന്’ പ്രതികരണം; വീഡിയോ

വീഴ്ച!! ആർക്ക് വേണമെങ്കിലും ഏതുസമയത്തും സംഭവിക്കുന്നതാണത്. ഏത് പോലീസുകാരനും ഒരബദ്ധം പറ്റുമെന്ന് പറയുന്നതുപോലെ ഏത് കൊലകൊമ്പനും ചിലപ്പോൾ ഒന്ന് തട്ടിതടഞ്ഞ് വീണെന്നിരിക്കും. ഇപ്പോഴിതാ അമേരിക്കൻ പ്രസിഡന്റ് ജോ ബൈഡന്റെ വീഴ്ചയാണ് ഇത്തരത്തിൽ ചർച്ചയാകുന്നത്.

Biden falls down from bike in Delaware 😢 pic.twitter.com/Z6NipmnfyS

— Nwabulibu (@Nwabulibu) June 18, 2022

ശനിയാഴ്ച രാവിലെ ഡെലവെയർ സ്റ്റേറ്റിലെ ബീച്ച് ഹോമിന് സമീപം സൈക്കിളിൽ പോകുമ്പോഴായിരുന്നു യുഎസ് പ്രസിഡന്റ് വീണത്. 79-കാരനായ ബൈഡൻ സൈക്കിളിൽ നിന്ന് ഇറങ്ങുന്നതിനിടെയാണ് സംഭവം. ഇതിന്റെ ദൃശ്യങ്ങൾ പുറത്തുവന്നതോടെ ശരവേഗത്തിൽ അവ വൈറലാകുകയും ചെയ്തു.

എന്നാൽ സൈക്കിളിൽ നിന്ന് കെട്ടിമറിഞ്ഞ് വീണ ബൈഡൻ, തനിക്ക് യാതൊന്നും സംഭവിച്ചിട്ടില്ലെന്ന് അപ്പോൾ തന്നെ പ്രതികരിച്ചു. ‘അയാം ഗുഡ്’ എന്ന മറുപടിയാണ് ബൈഡൻ നൽകിയത്. ഏറ്റവും പ്രായം കൂടിയ യുഎസ് പ്രസിഡന്റ് എന്ന നിലയിൽ ബൈഡന്റെ ആരോഗ്യവിഷയങ്ങൾ എപ്പോഴും ചർച്ചയാകാറുണ്ട്. അതുകൊണ്ടായിരുന്നു ഒരു ചെറിയ വീഴ്ച സംഭവിച്ചപ്പോഴേക്കും അമേരിക്കൻ മാദ്ധ്യമപ്രവർത്തകർ ബൈഡന് സമീപം ഓടിയെത്തിയത്.

സൈക്കിളിൽ നിന്ന് ഇറങ്ങുന്നതിന് മുമ്പായി പെഡലിൽ നിന്ന് കാലെടുക്കാൻ ശ്രമിച്ചപ്പോൾ കാൽ അതിൻമേൽ കുടുങ്ങുകയും തുടർന്ന് ബാലൻസ് തെറ്റി താൻ വീഴുകയുമായിരുന്നുവെന്ന് ബൈഡൻ മാദ്ധ്യമങ്ങളോട് പ്രതികരിച്ചു. താൻ ആരോഗ്യവാനായി തുടരുന്നുണ്ടെന്നും അദ്ദേഹം കൂട്ടിച്ചേർത്തു.