ന്യൂഡൽഹി: രാജ്യത്ത് കൊറോണ കേസുകളിൽ വീണ്ടും വർധന. കഴിഞ്ഞ 24 മണിക്കൂറിനിടെ 12,781 പേർക്കാണ് രോഗം സ്ഥിരീകരിച്ചത്. ഇതോടെ രാജ്യത്ത് ഇതുവരെ കൊറോണ ബാധിച്ചവരുടെ എണ്ണം 4,33,09,473 ആയി. 18 മരണം കൂടി സ്ഥിരീകരിച്ചതോടെ മരണനിരക്കും (1.21%) വർധിച്ചു. ഇതോടെ രാജ്യത്തെ കൊറോണ മരണം 5,24,873 ആയി.
4.32 ശതമാനമാണ് പ്രതിദിന പോസിറ്റിവിറ്റി നിരക്ക്. 130 ദിവസത്തിന് ശേഷമാണ് പോസിറ്റിവിറ്റി നിരക്ക് നാല് ശതമാനത്തിന് മുകളിലെത്തുന്നത്. പ്രതിവാര ടിപിആർ 2.62 ശതമാനമാണ്. നിലവിൽ 76,700 രോഗികളാണ് രാജ്യത്ത് ചികിത്സയിൽ കഴിയുന്നത്. 4,226 സജീവ രോഗികളാണ് ഇന്നലത്തേക്കാൾ വർധിച്ചതെന്ന് കണക്കുകൾ സൂചിപ്പിക്കുന്നു. 98.61 ശതമാനമാണ് രോഗമുക്തി നിരക്ക്.
രാജ്യത്ത് ഏറ്റവുമധികം രോഗികൾ റിപ്പോർട്ട് ചെയ്യുന്നത് മഹാരാഷ്ട്രയിലാണ്. തൊട്ടുപിറകിലാണ് കേരളവും. ഇരുസംസ്ഥാനങ്ങളിലും മൂവായിരത്തിന് മുകളിൽ രോഗികൾ റിപ്പോർട്ട് ചെയ്യുന്നുണ്ട്. ഇന്നലെ 4,004 പേർക്കാണ് മഹാരാഷ്ട്രയിൽ രോഗം റിപ്പോർട്ട് ചെയ്യപ്പെട്ടത്. കേരളത്തിൽ 3,376 പേർക്കും രോഗം സ്ഥിരീകരിച്ചു.
