ആലപ്പുഴ: രണ്ട് വർഷത്തെ ഇടവേളയ്ക്ക് ശേഷം നെഹ്രു ട്രോഫി വള്ളം കളി നടത്താൻ തീരുമാനം. സെപ്തംബർ നാലിന് വള്ളം കളി നടത്താനാണ് ധാരണ. വള്ളം കളി നടത്തുന്നതുമായി ബന്ധപ്പെട്ട് പിപി ചിത്തരഞ്ജൻ എംഎൽഎയുടെ അദ്ധ്യക്ഷതയിൽ തിങ്കളാഴ്ച എക്‌സിക്യൂട്ടീവ് കമ്മിറ്റി യോഗം ചേർന്നിരുന്നു. ഇതിലാണ് വള്ളം കളി നടത്താൻ ധാരണയായത്.
സാധാരണയായി ഓഗസ്റ്റ് മാസത്തിലെ രണ്ടാം ശനിയാഴ്ചയാണ് വള്ളം കളി നടത്താറുള്ളത്. എന്നാൽ വിപുലമായി ആഘോഷിക്കുന്നതിന്റെ ഭാഗമായി ഇത് സെപ്തംബറിലേക്ക് മാറ്റുകയായിരുന്നു. സെപ്തംബർ 11 എന്ന തിയതിയാണ് ആദ്യം കമ്മിറ്റിയുടെ പരിഗണനയിൽ ഉണ്ടായിരുന്നത്. എന്നാൽ 10ാം തിയതി മറ്റ് വള്ളം കളികൾ നടക്കുന്നതിനാൽ നാലിലേക്ക് മാറ്റുകയായിരുന്നു. ഈ തിയതി ടൂറിസം വകുപ്പ് അംഗീകരിച്ചാൽ ഉടൻ തുടർ നടപടികൾ സ്വീകരിക്കും.
2019 ഓഗസ്റ്റ് 31 നായിരുന്നു അവസാനമായി നെഹ്രു ട്രോഫി വള്ളം കളി നടന്നത്. ഇതിന് പിന്നാലെ കൊറോണ വ്യാപനം ഉണ്ടായതിനാൽ പിന്നീടുള്ള രണ്ട് വർഷവും വള്ളം കളി സംഘടിപ്പിക്കേണ്ടെന്ന് തീരുമാനിക്കുകയായിരുന്നു. രണ്ട് വർഷത്തെ കാത്തിരിപ്പിന് ശേഷം നടക്കാനിരിക്കുന്ന നെഹ്രു ട്രോഫി വള്ളം കളിയെ ആലപ്പുഴയിലെ ജനങ്ങളും ആവേശത്തോടെയാണ് വരവേൽക്കാനൊരുങ്ങുന്നത്.
Comments