ന്യൂഡൽഹി: ഗർഭധാരണം ഏതൊരു സ്ത്രീക്കും ബുദ്ധിമുട്ടേറിയ പ്രക്രിയയാണ്. കാരണം ഗർഭിണികളുടെ ശരീരത്തിൽ വിവിധ തരത്തലുള്ള മാറ്റങ്ങൾ സംഭവിക്കുന്ന സമയമാണിത്. അതുകൊണ്ട് തന്നെ ഊണിലും ഉറക്കത്തിലും ഗർഭിണികൾ അസ്വസ്ഥതകളോട് മല്ലിടേണ്ടി വരുന്നു. പലതരത്തിലുള്ള ഹോർമോൺ വ്യതിയാനങ്ങളാണ് ഈ അസ്വസ്ഥതകൾക്ക് കാരണം.
ഗർഭിണികൾ അഭിമുഖീകരിക്കുന്ന ഒരു പ്രധാന പ്രശ്നമാണ് നെഞ്ചെരിച്ചിൽ അഥവാ ആസിഡ് റിഫ്ളക്സ്. ഹോർമോൺ വ്യതിയാനങ്ങൾ മൂലം ആമാശയത്തിൽ നിന്ന് ആസിഡ് ഉൽപാദിപ്പിക്കപ്പെടുന്നതാണ് നെഞ്ചെരിച്ചിലിലേക്ക് നയിക്കുന്നത്. ഇതുമൂലം ഗർഭിണികൾക്ക് ഓക്കാനവും തലകറക്കവുമെല്ലാം അനുഭവപ്പെടുന്നു.
ഗ്യാസ്ട്രോ ഈസോഫേഷ്യൽ റിഫ്ളക്സ് അല്ലെങ്കിൽ ജി.ഇ.ആർ എന്നും നെഞ്ചെരിച്ചിൽ അറിയപ്പെടുന്നു. നെഞ്ചിനുള്ളിൽ കത്തുന്നത് പോലെ തോന്നുന്ന ഒരവസ്ഥയാണിത്.
നെഞ്ചെരിച്ചിലിനെ ചെറുക്കാൻ എന്തെല്ലാം മാർഗങ്ങളുണ്ടെന്ന് നോക്കാം..
തൈര്: പ്രോബയോട്ടിക്കുകൾ അടങ്ങിയ ഭക്ഷണ പദാർത്ഥമാണ് തൈര്. നെഞ്ചെരിച്ചിൽ ഉണ്ടാകുന്ന സമയത്ത് തണുപ്പിച്ച തൈര് കുടിച്ചാൽ ഉടൻ ആശ്വാസം ലഭിക്കുന്നതാണ്.
പാലും തേനും: ഗർഭിണികളിലെ നെഞ്ചെരിച്ചിൽ നിർവീര്യമാക്കുന്നതിനുള്ള മികച്ച പോംവഴിയാണിത്. ഒരു കപ്പ് ചെറുചൂടുള്ള പാലും ഒരു ടേബിൾസ്പൂൺ തേനും ചേർത്ത് കുടിക്കുന്നത് നെഞ്ചെരിച്ചിലിനെ പമ്പകടത്തും.
പൈനാപ്പിൾ: വിറ്റാമിൻ സി അടങ്ങിയ പൈനാപ്പിൾ നെഞ്ചെരിച്ചിലിനെ ലഘൂകരിക്കാൻ സഹായിക്കുന്നു. ഭക്ഷണത്തിനു ശേഷം ഒരു കഷ്ണം പൈനാപ്പിൾ കഴിക്കുന്നത് ദഹന പ്രവർത്തനങ്ങളെയും എളുപ്പമാക്കും. അതേസമയം ഡോക്ടറുടെ അനുമതിയുണ്ടെങ്കിൽ മാത്രമേ ഗർഭിണികൾ പൈനാപ്പിൾ കഴിക്കാൻ പാടുള്ളൂ. ഓരോ ഗർഭിണികൾക്കും ലഭിക്കുന്ന നിർദേശം വ്യത്യസ്തപ്പെടാമെന്നതിനാലാണിത്.
ഇഞ്ചി: ദഹന സംബന്ധമായ പ്രശ്നങ്ങൾക്ക് ഇഞ്ചി കഴിക്കുന്നത് നല്ലതാണ്. ഇഞ്ചിയിൽ ആന്റിഓക്സിഡന്റുകൾ അടങ്ങിയിരിക്കുന്നതിനാലാണിത്.
ആപ്പിൾ സിഡെർ വിനെഗർ: ആപ്പിൾ ജ്യൂസിൽ നിന്നും നിർമിക്കുന്ന ഒന്നാണ് ആപ്പിൾ സിഡെർ വിനെഗർ. യീസ്റ്റ് ചേർത്താണ് ഇതിന്റെ ഉൽപാദനം. അൽപം ആപ്പിൾ സിഡെർ വിനെഗർ എടുത്ത് വെള്ളത്തിൽ ലയിപ്പിച്ച് കുടിക്കുന്നതും ദഹനവ്യവസ്ഥയെ എളുപ്പമാക്കുന്നു. തൽഫലമായി നെഞ്ചെരിച്ചിൽ കുറയുന്നു.
അതേസമയം മേൽപ്പറഞ്ഞവയെല്ലാം ഡോക്ടറോട് ചോദിച്ചതിന് ശേഷം മാത്രമേ ഗർഭിണികൾ പരീക്ഷിക്കാവൂ. കാരണമെന്തെന്നാൽ ഓരോ ഗർഭിണിയുടേയും ശരീരഘടനയും ഹോർമോൺ വ്യതിയാനങ്ങളും വ്യത്യസ്തമായിരിക്കും. അതിനാൽ മേൽപ്പറഞ്ഞ പോംവഴികൾ ചില ഗർഭിണികൾക്ക് ഫലപ്രദമാകണമെന്നില്ല. നിങ്ങളെ ചികിത്സിക്കുന്ന ഡോക്ടറുമായി ചർച്ച ചെയ്തതിന് ശേഷം ഇവ പരീക്ഷിച്ച് നോക്കുക.
